ماتوا أحبابك ,,,,!!!!
على بيض النوايا والقلـوب الطاهـره تنويـك
وأنا أدري فيك تدري بي وتدري فيني أدرى بك
وأنا مابين إيه وْ لا .. سألتك لو يجي تشكيـك
أبي بس اعْرف ان اللي ذبحني ما بعد صابك !؟
يشوفون الربيع فعيني اللي لا حضـر طاريـك
نبت جفني زهر وانفاس روحي تنشر أطيابـك
تبيني لك هوى ؟ خذني خفوق ٍ جعلـه يسليـك
وش احلى ما يجيني غير حبك وأجمل عتابـك
أحبك والذي حط الحنان ف راحتيـن .. يديـك
أحبك والذي خلى الشدايـد تحسـب اْحسابـك
ويمكنّك تعَرف اني احبـك واعشقـك واغليـك
ولكن لو تعَرف اللي كتمته.. ضاعت !!ركابـك
أغير وما بَغير إن غرت لامن ذا ولامن ذيـك
باغير اْمن (العبير) اللي سكن في زهرة اهدابك
وانا أذكر لي عيون ٍ( بالعسل) مخلوقة ٍ تشفيك
و( سوّدها ) الكحل لمّا بكت من هاجس غيابك !
وفي لحظة تلاقينـا سجـدت لخالـق ٍ معطيـك
طهِر كل القلوب و دعوة ٍ تلهـج ب محرابـك
حبيبي لا تقول الآآآآه ماعاش الألـم يشقيـك
أبقطع له يدينه لو لمس بـك طـارف ثيابـك
حَبيبي لا تقول مْوادعـك.. لوهالوفـاة تجيـك
بأودِّع باقي اْسنينـي وأضـمّ فقبـري ترابـك
حبيبي لا تمّوت ميِّتـه مـا عاشـت الا فيـك
وأنا لا مت فدوة وأن حييت؟ و ربي / أحيابـك
ياليتك يا حبيبي بسْ / تبيني مثْل أنـا مابيـك
بتدري ليه أحس الموت كل ما مرّنـي/ جابـك
ولو مات الهوى اللي بك تغلغل / لاحشا مارثيك
متى حنا عرفنا لك حبيب ٍ "حيّ " واودى بك ؟!
أنا والله مأرثي غير بيـت ٍ مـا كتبتـه فيـك
عسى الله يغفر اْذنوبه على انه مات باسبابـك
بتبقى هالجبال الشامخـة توقـف لـك تحيّيـك
ويبقى هالبياض اللي تباهى فيك.. يحلـى بـك
بيبقى هالشعور اللي جرى فـي دمـي يناديـك
وتبقى هالقصيدة تحتري .. لـو ينقفـل بابـك
ورغم إن النوايا بيض / أبَطلب ربي يجازيـك
وأنا أدري ما يموت الحب لكن. . ماتوا أحبابك!