البارحه يوم اقبلت يوم قـفت=عبرة هل التقوى وفتنة هل الغي
صحيت من نومي وقمت اتلفت=تقل انتظر لي شي ومضيعٍ شي
من روعة الموقف عضامي تعفت=وكن السلاسل في يديَّه ورجلي
واللي مروعني عنودٍ توفت=من موتها حيه وميتٍ لها حي
فترة عزاها عيد غنت ورفت=له معظم احساسي والاعلام بيدي
والثانية شبيت ناري وطفت=في ضو نارٍ والعه ضيها ضي
منها برد حامي وبردا تدفت=وعظم الذبيحة مستوي واللحم ني
وضليت اصاليها وشامت وعفت=جوارحي لا تشتكي الحرق والكي
وابغى محاسنها وعني تخفت=واجحد مآسيها ومتباينة في
وحاولة فرقاها وثقلت وخفت=لا فزت في هذي ولا جزت من ذي
وابستشير اللي صفت له وصفت=بحور عرف وروس تامر وتنهي
وأخذ من الدنيا تجارب وكفت=وبالعشر تبصم له عوارف وتمضي
أبو محمد عزوتي لاستلفت=علي عدواني وبار الدهر بي
ملجاي لامن السنين اشلحفت=وصارت علي ظروف لاهي ولاهي
وريف الخوي بيت الكرم لاستحفت=دنيا الكرام وصارت أسوأ من السي
طويق لامن العقول استخفت=زبن الدخيل أول وهالحين وشوي
عِد الروى لا ضحضح الماء وجفت=كل العدود وطويت الارشيه طي
وان ثقلت القالة ودارة ولفت=يطلع بها القمه ويارد بها المي
وان عمست الارياء وهفت وزفت=رايه صواب ومخطي الراي مخطي
حربي على رايه وشوره تشفت=روحي وتوجيهه ورايه فخر لي
وان جات اشاره منه كفت ووفت=ويعبر بها البابور مع غبت دبي
رحلة عمر كان اقبلت كان قفت=عبرة هل التقوى وفتنة هل الغي

الشاعر / سعيد ثويني المحمدي