منتديات الموازين الرسميه - عرض مشاركة واحدة - :: هلا بالخاطر اللي لى خطر يرتاح معه البـال ::

غير متواجد حالياً

هلا بالخاطر اللي لى خطر يرتاح معه البـال
هلا باللي إلى جانـي يـروق لجيتـه بالـي

جفول لى حضرني وانحرج من زحمة الأزوال
أقوم لخاطره مـن مجلسـي واروح بلحالـي

أشبه جيته مثل الحبيب اللـي فراقـه طـال
نطحني وابتسم عقب الزعل في مدهل خالـي

إلي رد السلام وقال وشلونك وكيـف الحـال
حسبت أن السعادة كلها مـا خلقـت إلا لـي

أرحبه تراحيـب الثـرى للصيـب الهمـال
ألى هل وهطل واجزل وبارك غيثـه الوالـي

يجيني والحمـول ثقـال لاتتـرك ولاتنشـال
ويسري والخفوق المبتلى من همهـا سالـي

وانا لولا الخواطر والقلم والشعر والترحـال
تسليني عن همومي تلقيـت الخـلا الخالـي

انا شاعر ولا احب المشاعر في الضمير تغال
وراعي الذوق ما يخفى عليه المر والحالـي

أفاضلهـا وأميـز بيـن مايتـرك وماينقـال
واعرف ان السكوت احيان والصدات اجدالي

تمهل يانديمـي طالبـك لا تجـرح الآمـال
ترى بعض الهموم الغاليه محـذور تنقالـي

تحملها لعلـي بالحـوادث والزمـان احتـال
ترى صرختك في جوفي سببها صاحب غالي

وانا لولا الغلا واخشى يراعي يسحر العـذال
حرام إني لا ألبي طلبتـك واطـف مكيالـي

وانا اشوف القوافي شرفت مع هاير منهـال
وقفلتها على ذا البيت اولى له واولـى لـي

الامير خالد بن سعود