ياحمود ماشفته على الجيب ياحمود
امس العصر يوم انهم روحوبه
من عقبهم كني على الكبد ملهود
وكم واحدن قدامنا شق ثوبه
لاروح الفكسار ماهو بمردود
لابان مع راس الطويل انتحوبه
يطري عليه كل ماهبت النود
حرك غصون القلب دوبه ودوبه
اصيح وانادي مساعد ابمسعود
مجنون ليلى شق قبلي جيوبه
من الغاط حرك مشيه شوي بركود
عند المحطه ليتهم وقفوبه
لاكن مشيه ياخذ شوي ويزود
وانا وراهم والحبيب ابعدوبه
قلت اصبروا بفرش الدرب بورود
لعيون منهو فوق جيبه سروبه
قال ابتعد مالك ورا رفقتي فود
لك هقوتن والناس قبلك هقوبه
قلت استمع مادام للهرج مردود
ابدير ربعي والردا ما مشوبه
تاريخنا بالكتب تلقاه موجود
والجار ندمحله ونرفى عيوبه
مطلوبنا مجمول الاوصاف ياحمود
نقي عرضه والعرب ما اهرجوبه
وجدي على لاماك يالين العود
ليت الوصل هبت علي هبوبه
من دونهم حطولي احدود واقيود
حسبي على اللي من البلد غادروبه
لا والله الى حال من دونه حدود
للغاط يمي ليتهم عودوبه
وصلاة ربي عد ماهبت النود
واعداد ماتذري هبايب هبوبه







الشاعر / خالد متعب القلعاء