((من لايحوش النعم فاول شبابه))
كُتب : [ 08 - 11 - 11
- 02:01 AM ]
قصيده للشاعر الكبير مفرح الضمني المطيري رحمه الله تعالى...
((من لايحوش النعم فاول شبابه))
أنا رفيقي ماسمـع اللـي حـــكابـه
لو جاتنا منه السوالـف مضاريـع
اقرا مفاهيمـه واحسـب حسابـه
واشوف مدخال القـدم والمطاليـع
ماني عجول ٍ بالزعل فـي غيابـه
مادام ماسمع منه مااعطي ولا ابيع
لاخير فـي رفقـه بليـا حبابـه
ولاخير في جمع القلوب المواجيع
ورفيقـك الغالـي تحمـل عتـابـه
واحلم عليه ليـا دفعتـه دوافيـع
شيـم ثنـاه ولاتبـيـن عيـابـه
عاره يعـورك يابعيـد المراميـع
وان كان دون مرافقك صـك بابـه
لقه قفاك وخل مشيك مـع الريـع
خله على بعـدك يسـرح ركابـه
يقضي سنه وإلا شهور ٍ واسابيـع
وليا طلبـك الصلـح يامرحبابـه
سهل طريقـه لا يجيلـه موانيـع
واحفظ لسانك عنه واستر جنابـه
لاتجرحه بين الذيـاب المجاويـع
ترى اللسان ملكـع ٍ يندعـا بـه
مثل الحصان اللي يبي له مصاريع
واجعل على هرج ٍ تقولـه رقابـه
عقل ٍ يصرف طايشات المواضيـع
والصمت في بعض المجالس مهابه
يكفيك شر اهل الفلـي اللواسيـع
عن كلمة يقضب خطاهـا قضابـه
يركض عليه مصنٌع الهرج تصنيع
خله يروح ومنـك خـال ٍ جرابـه
يرجع كما المفلس بسوق المطاميع
واحفظ صداقـة طيبيـن القرابـه
ربعك ليا قلٌت عليـك المشاريـع
سيف ٍ نهار الضيق تقضب نصابه
يقاك من حدب السيوف البواتيـع
وليا جفاك الـدار مالـك ومابـه
رزقك على اللي طوع الكون تطويع
مقعدك في حزم ٍ تطـارد سرابـه
اخير من شوف الوجيه المدانيـع
خطو الرخوم مصاحبيـن الخيابـه
تجار هـرج وفاللـوازم كراسيـع
الرجل مثل الذيـب رزقـه نهابـه
ياخذ مع الدو الخـلاوي قراطيـع
والطيب ضلع زاميـات ٍ هضابـه
للريح في شامخ ركونـه ذعاذيـع
عسر المراقي يتعب اللـي رقابـه
ماياكره كـود الحـرار القواطيـع
والا الردى جرف ٍ هيـال ٍ ترابـه
حوله لزهـران المقافـي مرابيـع
يرقد به الحصني ويلقى الذرى بـه
والبوم بين غصون قشعه مواقيـع
رجل على الناموس بيض ٍ ثيابـه
ورجل ٍ يرقعها على المتن ترقيـع
ورجل يزايم علتـه مـن عذابـه
عيـدان نـاره للقريـب مواليـع
على الجماعة كـل يـوم ٍ طلابـه
خماش وجـه ولالقيبـه منافيـع
ورجل ٍ مـع الايـام ماينصخابـه
عون الرفيق ليا صفعته صوافيـع
غيث ٍ على من جاه يمطر سحابـه
عشبه عل روس النوازي مفاقيـع
ورجل ٍ كما ليث ٍ عطيب ٍ صوابـه
من دون حقه سنع الخصم تسنيـع
طيب وعصمان الشـوارب تهابـه
يرجى وتخشاه الرجال الصعاصيع
ومن لادرى بالناس ماحد ٍ درى به
ماله على سجل النشامـا تواقيـع
ومن لايحوش النعم فاول شبابـه
في شيبته يحسب حساب المراضيع
وختامها ذكر النبـي والصحابـه
واستغفر اللي مايضيع ولا يضيـع
|