منتديات الموازين الرسميه - عرض مشاركة واحدة - مرثية خلف فيحان الدجيماء في والده فيحان بن مسعد الدجيماء

غير متواجد حالياً

[]يالله عسى عفيف تسقيه الأمطار
دايم على عفيف تنشي مزونه
يصبح ربيع وصيف ماهو مخظار
وترحله العربان ثم ينزلونـــــــــه
ياخذ سنين ٍ كلها امطار واقفار
ويبرد لهيب الصيف مايونسونــه
حيث ً به ابوي سكن وسطه بدار
قبراً عسى ربي يوسع اركونـــه
يالله يالمعبود يا وال الأقدار
يا واحداً كل الملا يعبدونـــــــــــه
ياخالق الجنه وياخالق النار
يا مخرجاً ذالنون من بطن تونــه
ياعالم ٍ ماكان ولوكان كيف صار
يامحصين خلقا ً خلقته بهونــــه
ترحم ابوي وتدخله دار الأبرار
في جنة الفردوس تكرم سكونه
عبدا ً عبدك وحدك سر واجهار
ومفوضك يارب في كل شونــــه
لاهو بنمام ٍ ولايذي الجار
ولاهو من اللي ربعته يكرهونــه
رجلا ً كريم وبالشجاعه له اذكار
ويفرح اليا شاف النشاما يجونــه
لاشان على ربعه ولاباح الأسرار
ون جاه زله كنها في كنونــــــــه
شاعر وراوي وعارف ٍ كل الأخبار
ويجيب من الأخبار مايطلبونـــــه
حلحيل حلال الصعيبات بيطار
وقاضي ويعرف للقضا كيف لونه
ويفسر الدعوه لك امرار وامرار
قدام تاقع والحكم يعرفونـــــــــه
اليا جلس في مجلسن جاله انوار
نور على الحظار واللي يجونـــــه
سلطان مجلس ون جلس كل الأنظار
يمه تحول ون هرج يسمعونــــــه
لاهو بكذاب ٍ ولاهو بجوار
واهل الردا والكذب ما يصاحبونــه
يبغظ قليل الدين في كل الأقطار
في الله يبغظهم ولا يقربونــــــــه
صفات ابوي اللي حميداتن اكثار
والله محصيها وانا في حزونــــــه
عن وصف ابوي تعجز كثيرات الأشعار
مرحوم يالي ما مشى بالمهونـه
وانا على مادبر الرب صبار
راضي بحكم الله ومنه المعونـــه
لاني بجزاع ٍ ولاشاق الأزرار
يومه وفا والموت ما شي دونـــه
وصلاة ربي عد من حج ثم زار
واعداد نجمن فالسماء ينظرونــه
على النبي الهاشمي خير الخيار
محمد اللي أمته يــــــتبعونـــــــه[/]