قال ولدي ليش البلد خربانه=الناس ليش وجيهها زعلانه؟؟
تقرا الألم بعيون كل مواطن=حتى الأماني غصونها ذبلانه
تشعر بان الناس مو مرتاحه=ناسٍ تسوي نفسها فرحانه
رغم ان ديرتنا بخير ونعمه=والمركزي خزاينه عمرانه
وبترولنا سعره تعدى حده=عدى على السبعين فوق الخانه
والعقل راح ولا بقاله باقي=ورغم الوفر كل البشر طفرانه!!
نشوف بعض الناس تبكي جابر=وسنين حكمه وحكمته ويمانه
والبعض الآخر عايشٍ بالماضي=يبكي على الماضي بكل الوانه
من عاش بالماضي نسى المستقبل=كنه يصلي الفرض قبل آذانه
الكل وقتٍ دولته ورجاله=ولكل عهدٍ فرحته واحزانه
بس الوطن وحده هو اللي باقي=الحق واضح مايبي تبيانه
ياللي بتعين الناس ساعد نفسك=أحفظ وطنك اللي عزيزٍ شانه
أقولها صادق من أقصى قلبي=ماهي سواف دان داني دانه
حافظ على تراب الوطن بعيونك=خل المواطن يرتمي بحضانه
خله يحس ان البلاد بلاده=وهمها كرامته منصانه
ياناس ملينا نصيح وننخا=شف ذا القهر وقلوبنا مرضانه
قمنا نشوف أوضاع ما تعجبنا=بوق البلد والذمه العطلانه
العسكري يحرم من الجنسيه؟؟=اللي على كفه يشيل اكفانه؟؟
حامل سلاحك يسحبون أثباته =وتجنسن الفنان والفنانه؟؟
والآسيوي واللي بعد متعاون=والبهلوان وشلة الزفانه
كن البلد خالي من اهل الشيمه=صفت على الطبال مع طيرانه!
حنا بلانا دوم كله واحد=ريال لو هو ما سوى ذبانه
ريال لو هو ما يدل القبله=ريال لو دربه بدون ديانه
ريال بس بغترته وعقاله=وان كثرت القالات عزمه خانه
والجنبي الملعون نافش ريشه=وراعي البلد متنتفه جنحانه؟؟
ناس تنام بضف حضن ضافي=وناس تنام ظهورها بردانه
واحد تشوفه صاحي ومتعافي=واحد طوى جوفه طوى مصرانه
شخص يجي مرتاح ناسي همه=وشخص يتلفت خايف الديانه!
ناس حدر خط الفقر مدفونه=وناسٍ على حد الطغى بطرانه
تدرون وش خرب نظم ديرتنا؟؟=حتى تكافلنا هدم بنيانه؟؟
المستشار الله يطيح حظه=من يوم دش البيت هز أركانه
حط الحواجز بين أهل الديره=الله يلعن خاله او عمانه
سياسته فرق تسد معروفه=غير الدجل والكذب فيه خيانه
لا خير فيه ولا يخاف من الله=قلبه غشيش وضحكته بلسانه
ملعون من ساسه لحتى راسه=معنا سنين ولا صفا وجدانه
عطوه جنسيه وصار كويتي=وبالقصر الأحمر ذبحوا جدانه
الله وكبر صار مثله مثلي=حسبها صح وحسبتي خسرانه
دش السباق ونافس اهل الديره=غصبٍ على الزعلان فاتح فانه
لا تحسب ان الشعب ساكت راضي=يجيه يوم وينفجر بركانه
يجيه يوم وينفجر ويبادر=مثل السجين اللي سجن سجانه
الوضع من سئ يسير لأسواء=وضع خطا والتجربه برهانه
صرنا بوادي والحكومه بوادي=مافيه محسن يغمرك بحسانه
يعني تشوف اللي يشيب راسك=كيف الوطن ما يلتفت لأنسانه؟؟
منهو لقا مسؤول فاتح بابه؟؟=ومنهو لقا مسؤول في ديوانه؟؟
لا شيخ.. لا مسؤول.. يسمع صوتك=كلٍ عن الشكوى يسد آذانه!!
ومنهو كتب مكتوب وحصل حقه=ما جاه رده لو كتب عنوانه!
المرجله والبخل ما تتوالف=مافي بخيل المرجله ديدانه
البخل هو ساس الردا وسبابه=والرجل عينه والعقل ميزانه
والصقر ما عمره كلا في الجيفه=والذيب ما ياكل لحم ذرعانه
والعود الأصلي لا بغيت تعرفه=عند احتراقه يعجبك دخانه
اللي يبينا نقدره ونهابه=لازم يحسسنا بانا اخوانه
واللي يبينا نرغبه ونعزه=ما يجاهد التاجر على دكانه
واللي يبينا نسمعه ونطيعه=يخاف فينا الله قدر امكانه
واللي يبي منا نقبل خشمه=لا يوقف الحارس على بيبانه
ما يستوي منصب قوي وتجاره=من صانها صارت عشا ورعانه
من حاش منصب جاك شايف حاله=يمشي كما الطاووس جر أردانه
لا جيت تطلب من جنابه موعد=ولا طلبته حق جن جنانه
لازم يدور الحول وانت تراجع=والناس غيرك كلها قرفانه
بين السكرتيره ومدير المكتب=مابين هالتعبان والتعبانه
الكل منهم دائماً متجهم= مايبتسم إلا لطبيب أسنانه
هو يعتقد انه ملك هالكرسي؟=ولا بعد مااخذ عليه أرهانه؟؟
كم في بلدنا من وزيرٍ سابق؟=لو مانسوه اتعمدوا نسيانه
كلٍ يقول أبعد وريح بالك=لا تنصحه تصير من عدوانه
لا صار رزق البر خيره وافر=أنت شتبي فالبحر مع حيتانه؟؟
وأقولها ما اهاب وأرفع صوتي=شيٍ بقلبي كايدٍ كتمانه
واللي بيزعل يا عسى ما يرضى=ما همني الحمقان والحمقانه
ولا همني من يرسل ويتوعد=تحضر شياطينن حضر شيطانه
وش بيحصل ازود من اللي حاصل؟=أزود من التهديد بالزنزانه؟؟
العز للرجال رفعة راسه=ومن ذل ذل وزوده بنقصانه
لا مستحي والله ولاني خايف=كلٍ على حقه طويل لسانه
لابد يشهد مسرح الشاميه=للي وقف له وقفة مليانه
ماهو بأنا اللي لا حكا يتلفت=يخاف حتى قرصة الذبانه
من قال ديرتنا تشكا منا؟؟=بيت الشعر ما يشتكي عمدانه