يا زين يا نايف بعد نقلت الطير=نو(ن) من القبله تكاشف بروقه
على الجزيره جعل نوه محادير=ما باينت شمس الضحى من سحوقه
الله من نو السماء ينزل الخير=يحي هشيم(ن) يابسات عروقه
وسم(ن) من القبله مزونه مزابير=الله على الدار المحيله يسوقه
وتربع الريضان عقب المعاصير=ويربع الصلب الحمر مع سبوقه
ويضفي على الصمان دار المشاهير=دار(ن) لهلها عاشق(ن) لمعشوقه
صمان لاشفته يذكرك بمطير=قصيرهم يأمن ولاحد(ن) يبوقه
وباقي القبايل نعم من دون تقصير=كل(ن) من العربان ياخذ حقوقه
دار(ن) بها يازين شوف المغاتير=تقطف من العشب المبكر عذوقه
يا محلا در البكار المصاغير=من العشب ترعى والعلف ما تذوقه
والجيب شارينه بعد جيب تصدير=بعيد المرامع جعل مالله يعوقه
ونختار من جزل الحرار البواتير=الصافي اللي مرهي(ن) في لحوقه
طرح الشبك يشرا بغالي الدنانير=بأغلى ثمن شاريه من وسط سوقه
وحش خلا ما ملدوه الصقاقير=ليشاف جول الربد مافيه توقه
ماهوب تفريخ(ن) ولا هو من الجير=راع الولع من نظرته له يشوقه