ياسخيف الذرعان مانيب مرجوج
رجتني الأيام غدرا وحيله
يابنت لولا اللي على تاسع الفوج
تركت نجد وعزوتي بالقبيلة
لاشك حاديني على نجد هادوج
مسقي الفيافي لين يدرج مسيله
تركي ليا من الليالي غدن عوج
يشيل حمل عتيبة ما تشيله
يرسي كما ترسي البواخر على الموج
ومنين ماصك البحر يرتكيله
مادام تركي حي ماودي أدوج
وإن غاب غبت من الرجوم الطويلة





-2-









متى يجي في نجد بعض التدابير
حتى يجي للصابرين انفراجي
يالله ثبتني على الارض لا اطير
لين اشرب الشاهي واكل علاجي
علاج راسي حبتينن بقصدير
اللي عليهن رسمهن بزدواجي
ويامنير اخذ الفرت واخذ الفواتير
واحرص عليه ودخله بالكراجي
ان كان يبغى زيت عب المواصير
وان كان يبغى نار غير بواجي
واليا استعد وضخر البعد تصخير
تصخير شيهانا لفرخ الزراجي
عده على اللي مايعد المخاسير
ركاز عمدان الخشب للنعاجي
ثم قل لبو ماجد ترى وقتنا غير
واتبدلت سحب المطر بالعجاجي








-3-








يالله ياجال الأمور المهمه
تجلى وهق قلب برى حال راعيه
البر دجته والبحر رحت يمّه
أدرج سبب حظ على الله مساعيه
يوم إن ولد اللاش رزقه على أمه
رزقي على اللي ميّت القشع يحييه
ماني وانا بندر ببياع دمه
يقطعك يا بيّاع دمّه و مهفيه
اللي يبيّع لابسات الأزمه
ثور(ن) يبي بيض العماهيج تغنيه
يزعل ليا جت ليلة الدول يمّه
يرضى بسوق المال بأخيه وأبيه
خطو البخيل اللي يكبّر معمه
يقرا الكتاب وواجب الله مخليه
أما هرج له في رفيقه بنمّه
والا عطى وأمه تضيّع هقاويه
يامل قلب كل مامات همّه
دارت دواليب الدهر لين تحييه
فرّاق شمل الناس عيّا يلمه
وقت(ن) يشيب الراس من شاية(ن) فيه
أحد(ن) ينام وحط راسه بكمه
وأحد(ن) تخم النوم عينه وتخطيه
و أحدن يحاول بالردى بنت عمه
وأحد(ن) يحاول ستر عذرا عوانيه
تخالف الأنظار شرق(ن) ويمّه
كل(ن) هدف رايه من الناس مرضيه
أنشدك ياللي كل شي(ن) تتمه
تقرا الكتاب وكل فرض(ن) تصليه
ويش القليب اللي عميق مجمّه
ماسر غرسه ماه عطشى سوانيه
سم السبب يا عارف(ن) عنه سمه
سم السبب يا عارفه قبل اسميه








..
..
يتبع
..
..