الشفت لخبط راحتي مثل نومي=والزّيت ماشي فالانابيب ويزيد
والزّام زام الصبح جعله يشومي=قد كان له مع ماضي الوقت ترديد
عزّاه ياحظٍ حسبته يقومي=عزّاه ياحظ العنا والتباليد
أحدٍ تليبس من جديد الهدومي=وأحدٍ معيّد فالعيد عند الرغاديد
و أحدٍ سواتي مايل الحظ يومي=وعليه مع لبس الكفرهول تمديد
قيجات بمب مكسرات الخشومي=ومراوحٍ تفتر من دون تبريد ومرواحٍ
وبيبات بقعا ما تعرف القرومي=لاشفتها ماغير أجر التناهيد
حالي على العيدين مثل الهشومي=متهشمٍ حالي على الضمّر الغيد
وألا على المقناص بعد العزومي=فالساحل الشرقي لحزم الجلاميد
حرٍ طليق مع الهوى والحزومي=غادي لأبن عدوان وإلا لبو زيد
ياصاحبي صبري قضى مثل يومي=عليك ياللي كايل الكيل وتريد
يالله يامنشي مزون الغيومي = أنك تعدّلها من الشّفت والقيد
شف يارفيقي قبل اقطّع هدومي=ما ابغى حقوقي.. بس لي حق فالعيد
ودّي اعيّد بين ربعي وقومي =والزام ماسكني على التيم تأكيد
ياليتني ياخي... موظف حكومي =ماعرف زام الليل وآعيّد العيد