معاد اداني بنظرتي بعض الاشكال = اللي حياته فالبسيطه خساره
اللي هدفها هرجت القيل والقال = تبغا تفرق بين جارن وجاره
المرجله تصعب على كل رجال = الا على رجلن حكيمن قراره
والمرجله مالبسها بشت وعقال = والمرجله ماهي مجرد عباره
المرجله تبغالها عزم وافعال = والنار ماتالع بليا شراره
للحرب حرابه وللخيل خيال = حكمه وشجاعه ومتثال وشطاره
انكان ماهوللصعيبات حلال = ودك على راسه يهدون داره
دنيا تقلب كل يومن على حال = كم واحدن فيها يضيع مساره
ياالله توفقنا على خير الاعمال = ياخالقن خلقه ومحيي دياره
وختامها صلوعلى سيدالاجيال = المصطفى الهادي صدوق البشاره
الشاعرتركي بن مخلد الميزاني