جساس لا تسكن بدار المساكين=لو المطر عله وروض ربيعه
ابعد عنه لو راح غين وبساتين =الله خلق بيداً افججها وسيعه
والرزق عند اللي خلقنا من الطين=ربن خلقنا رزقنا مايضيعه
خلك مع الشجعان لوهم بيعيدين=وادرس مناهجهم بكل الطبيعه
ترى الردي لو زان عندك نهارين=حبله اضعيف ومعترض للقطيعه
لو منضره طيب و عنده ملايين =عند اللوازم مايسد الذريعه
خله ايولي من احساب المولين=والنفس لاترضى عليها الهزيعه
واتعب ورى الدنيا وحافظ على الدين=الوقت يجري والليالي سريعه
وحفظ اللسانك لاتضريه لشين=ترى اللسان ايزل بك لاتطيعه
واللي يعزك خله اغلى من العين=خلك معه وان جت عليه الوقيعه
واللي يهينك زد له الصاع صاعين=واكحل اعيونه من حماط النقيعه
وان قربو عند القضاه الموازين=خلك حليم اوسد للخصم ريعه
ترى الزعل يفتح الخصمك براهين=والحلم يبني لك احصون(ن) منيعه
ون جاك زلاتن من الربع الأدنين =اصبر وسدك جوده لاتبيعه
ون خاب ضنك فالربوع الموالين=مالك على النايد حقوقاً بديعه
وحنا على النوماس والطيب ضارين = نطمح الميصال البروج الرفيعه
نطمح و ناخذ وقتنا بالتمارين=نوباً يطاوعنا ونوبن نطيعه
ونقالب الدنيا على العسر والين =وحبالنا وقت الشدايد متيعه
وختامها مني صلاتاً بتمكين=على الرسول الي شرع بالشريعه