واصرم قلبي صرم عشب المقيضة = مع شوبة الكنة وحام الطواليع
انزاح مرباعه وشمسه رميضة = وغار السموم ارثاع عج المخوايع
من عقب ماضلت فياضه رويضه = ماعاد تشبع به فروخ الجرابيع
على الذي يهتاضني واستهيضه = هايم غرام مولعاً فيه توليع
ماانساه لو انسى صلاة الفريضه = وأن الذي ماأسمع بحبه ولا أطيع
خده سنا برقاً زما في وميضه = برقاً تلالا في السحاب المهانيع
نواً على سيله يعلم نفيضه = يشيل طول سنايد الحزم ويتيع
وياعود ريحاناً غصونه غضيضه = تلاعبه فوق السواقي ذعاذيع
لاهف حشا ماله وصوفاً بغيضه = أشتاق له شوق العذار المفاريع
وأن كان مالي في البخوت الحضيضه = ماظنتي عقب المفارق مراجيع
لو من فقد خلاً وفا يستعيضه = ماسال دمع امن العيون المواليع
واهنيكم يااهل القلوب الفضيضه = ياللي تردون السوالف مصاليع
ماتعرفون المبهمة والنقيضه = ولا اسقتكم الفرقا المرارة قراطيع
ماصابكم حر المفارق مضيضه = وأنا على جمرة مفارق وتوديع
غار الجروح النازفه والنضيجه = اجاذب الونات بالصدر ماأذيع
اخاف من سود القلوب المريضه = كبار الدفوف مولدين المضاريع
أجبر عزاي بدمع عيني وافيضه = واواسي الخاطر بذكرى وتشفيع
ذكر رجاي اللي عروضه عريضه = قدام لايقبس فتيل المقاميع
وراسي رفيع ولايفيد اتخفيضه = لو الليالي مايجيني مطاويع
وياوقت سافر بالحمول البهيضه = لاتذنب النفس البريه بلاطيع
ذنبك على النفس البريه غميضه = مافيك لا سرا ولابك منافيع
مالك على مشهاة الأنفس رفيضه = لاتوقظ الفتنة بطق الأصابيع
خل الهوى يسمع لركبه نضيضه = ياخذ على رمل الصحاري مراميع