بسم الله أبدى وانثر الدمع وأبكيك
أبكي على ساس الكرم والمهابه
يا أبوي يا اللي وافيات مساعيك
فيك الكرم و الطيب كلآ درابه
يالشاعر الجزلات تبقى قوافيك
هذا ولدك اليوم يكتب جوابه
يا اللي سكنت القبر صوتي يناديك
يهل دمعي مثل وبل السحابه
أبكي عليك اليوم من عرض أهاليك
ويبكيك بيت العز ويصيح بابه
بك أنتخي يابوي وبحرفي أرثيك
ومن لامني جعله يضيع صوابه
ياأبوي أجرالصوت وبشعري أشكيك
وأقنب من الفرقى قنيب الذيابه
ياأبوي أشوف الموت لاحل طاريك
وقت مضى وياك لا واسفابه
ولوطالت الأيام ما أنيب ناسيك
وشلون أبنسى من عطاني شبابه
والله ما أنسى لين قبري يواسيك
وأرحل من الدنيا وأجهز زهابه
لوتنفدى بالروح والله لا فديك
يفداك عمرآ زود حزنه سرابه
يا أبوي جعل الغيث يمطر ويسقيك
يرش قبرك لين يروي ترابه
يا أبوي خمس اعوام ماجاء مداويك
عسى لك الجنة من الله وهابه
يالله عسى ماصابك وكان موذيك
تكفير ذنب وراحة من عذابه
عسى ختام الصبر يابوي يرضيك
ومن صافي الفردوس تغسل مصابه
عسى بعال الخلد مسكن خطاويك
وكتابك .. بيمناك تملك خطابه
في جنة منزالها عند واليك
مع النبي الهاشمي والصحابه
وختامها نصلي عـلى أحمد بتاليك
عدد رمال البر واللي وطابه