يالله انك تبعد اهل البلاسه والحسد=وعن مواطنا تبعد جميع اوطانها
الهنوف الي لها كم بذلنا من جهد=واكتوينا في الزمن من جمر نيرانها
مني اخذت كل تفكيري بليا عهد=ولغلاها أحشاي قد شرعت بيبانها
لين من عقب التعب والتوجد والنكد=صار بين جروحي الخافيه مسكانها
بري حالي كل ماقمت افكر بالوعد=عند ورقا قامت تجر لي الحانها
للمحبه داخل القلب معمورٍ بلد=والله اني متعبٍ هاجسي من شانها
جعلني ماذوق حر المحبه يافهد=نعنبو عينٍ تلدد ورى خلانها
دام اشوف ام الترف كني اشوف السعد=سالمٍ من شر بقعا وشر اعوانها
الغنج والزين فيها لقوه بدون حد=وقبل تحكي تازن السالفه بـ لسانها
كل يوم أسرف بـ شوقي لها ولا اقتصد=واكحل عيوني لاجيت بسواد اعيانها
لو تغيب الموت يمكن يوردني اللحد=بعد ماخضر بـ حشاء خافقي بستانها
اليالي برد مايرحم من الناس احد=والدفاء في قلب مدهله من شريانها
حبها سهومه تزارق بـ قلبي ماترد=كان طحت اليوم ماطحت غير وزانها
مابقى للناس عندي حساب ولا عدد=ولا تخون العين لو إن حظي خانها