الشاعر لافي حمود الغيداني
================
[[ شـــاعر الوصـــــــــــف ]]



يامكثرين الهرج لا سمع ولا اجيب

تريحوا من فضلكم واسمحوا لي

تريحوا لا تلحقون المشاهيب

على الردى ما ني شفوقن عجولي

بالعقل والصبر ادب النفس تأديب

ولا لها مدة تصول وتجولي

خلجن ترازم في سياج المحاديب

مافيهن اللي بالعقال معقولي

اشد واطيب زور من شمخ النيب

اليا ضاع مفعول الحيل والحلولي

انا لياما قلت للقول ترتيب

حتي يجي كي (ن) على فك قولي

ليا ارسلت لافكار القريحة مناديب

ترايعن من عقب ماهن جفولي

لكن مالي من وراها مكاسيب

ولو ان عشاق القشر صفقوا لي

ما يستفيد الا العدو الاجانيب

ولاني مطيع مقرقعين الطبولي

خليتها تعطي فجوجن مجاديب

جرباً تجود في رسنها مهبولي

والله لاجبن دام لي درب تجنيب

من شرهة حشام الرفاقة خجولي

لو انها بين النحر والتلابيب

من الحيا وجهي ماهوب مغسولي

طبعن لنا نشب عليه ونشيب

وطبيعتن لعلها ما تزولي

على الجماعة للجماعة مواجيب

الى جهلوا قدر الرفيق الهتولي

ماني على ربعي قريب محاضيب

ادناه ما يخليني اسرج ذلولي

ان جات من طيب شقاها على الطيب

لو انها اعوج من رقبة الذلولي

وان جات من مسكين منطق واساليب

حطيتها بين الثرى والنعولي

لا حركت شعرة ولا طلعت شيب

ولا ضيقت صدري ولا طق جولي

وان كان في صبري على ميلهم عيب

العيب تفتيش الصرر والحثولي

لا قمت تذكر في رفيقك عذاريب

وتبين عيوبه لذولا وذولي

صبرك على ربعك علاج وتطابيب

يقصر حبال السالفة لا تطولي

حتى ما يلقى في طرفها مقاضيب

كراه خير وللمشاكل ميولي

وليا بليت بتايهن شره وصعيب

يقول انا العراف وانت الجهولي

قل الله الله ياحصان الاطاليب

يالفاهم العالم عطيب الفعولي

هذا الكلام اللي ما في صحته ريب

لا نيب لا حولك ولا انته بحولي

حصان وابن حصان طيب مجاذيب

وبالمعرفة رجلن محلي ودولي

خله يروح ويخطي الدرب ويصيب

ويقول ما بالناس عرض وطولي

والفرق ما هو باللحى والاشانيب

الفرق بين الناس فرق الفعولي

كم واحدن تحسن به الظن ويخيب

السن يضحك والفؤاد معلولي
اتمني أن ترضي أذواق الجميع............حلا نجد