لا والله الي قربت ربطه الطير=مع ربطته معاد نبغى البراري
في عشتن مترين مربوط بالسير=القيض كله لين تبداء الصفاري
مسجون فالعشه عيونه مغاوير=عقب الفضاء ومطارده للحباري
راعيه عقب الجيب في موتر صغير=بدل صغيره عقب جيب السفاري
وعقب القنص تحت المكيف مخامير=معاد نطلع من محيط الحواري
ونوسع الخاطر ابعض المسايير=ولاعاد يذكر للمقانيص طاري
نسوق بالورعان تبع المشاوير=الوقت متغير علينا اجباري
ومطول ليالي القيض عند الصقاقير=وفصل الشتاء يمر منته بداري
ونجم الجنوب اليا طلع له تباشير=ويصير للصقار حالة طواري
اليا طلع والوسم مزنه مزابير=من اول بكور الوسم ملئ الخباري
ساقها على الصمان وال المقادير=سيله على حسنه وهاك المحاري
توارده بدو(ن) تسوق المظاهير=قبل الكباين يسحب(ن) بالواري
يوم البداوه والرجال المشاهير=على الركايب يقطعون الصحاري
دنياً تبي من كامل العقل تفسير=والخبل في غفله ولاهو بداري
كثر المهايط والليالي مدابير=كل(ن) على عمياه بالليل ساري
سبحان رب(ن) دبر الكون تدبير=الواحد اللي للخفيات
داري