المشاركة الأصلية كتبت بواسطة الامبراطور يابن مصاول لا تولف كلام ماله اساس اسأل المدالجة اللي ما يزيفون الحقائق وعندهم علم اكيد فاسأل ذوي غالي وذوي مغلي واسأل جميع ذوي عون يقولون لك الحقيقة كامله . فلا تقولي قال فلان وقال شاعر المدالجة وبعدين ابوك ترى ماهو شاعر المدالجة. فيه طال عمرك شقير بن عجل وفيه غيره من المدالجة صح شاعر بس فيه شعار احسن منه ومن اللي لقبه هذا القب ماسمعناه إلا منك طبعا بدون قصور في ابوك الله يرحمه

يا مدعين الشعر لا تفضحونه=الشعر يبغا له طروقٍ نقيات
ويبغا هله كان أنكم تجهلونه=اللي لهم في عالم الشعر جولات
اللي اليا جا موسمه يصنعونه=صناع كلمه والمعاني قويات
ماهو كلامٍ بعضهم يجمعونه=خالٍ من المعنا بيوته هزيلات
هزوا نظام الشعر وأرخوا ركونه=وأرخا عناقه عقب ماهن رفيعات
وشان طّعمه يوم انه أقفت أحتونه=وشانت قواف الشعر ومنقده مات
اليا صار مابه عالمٍ يفهمونه=ويحضرونه في حتونه اليا جات
قولوا لشعار الغلط يتركونه=الشايفين نفوسهم في المرايات
قولٍ بلا معنا يسمى مهونه=ويّنزل أصحابه من أعلى المقامات
والرجل حوله عالمٍ ينقدونه=أصحاب عقل وراي وألهم مقالات
يدرون عن ممشاه ويقيمونه=أما ردي ولا حموه بشهادات
ياللي تبون الشعر وتضيعونه=قولوا بمعنا وأحسبو له حسابات
وليا بغيتوا واحدٍ تمدحونه=ترى رجال المدح فيهم علامات
وليا جبركم واحدٍ تكرهونه=ترفعوا عن سب الأحيا والأموات
ما كل من يعجبك غيرك يبونه=لك نظرةٍ وحده وللناس نظرات
وأبن سبيل قايله في لحونه=لك شوفةٍ وحده وللناس شوفات
والشعر حّرف جوهره عن يكونه=وقضوا عليه مراسلين المجلات
أعني به اللي ماترفق بهونه=يبغا الطريق ولا عرف للمسارات
ياليت من يرسل لهم يمنعونه=ويقال له ممنوع منعاً بعد بات
حتى يزين الشعر طعمه ولونه=ونامن عليه من الخطر والمتاهات
وعنه ردي المعرفه يبعدونه=أبعد من أرض الهند عن ظلع أبانات
قلته وأنا قلبي تعاقب ضنونه=من عالمٍ ما ينعرف له تجهات
من وين ما هب الهواء يتبعونه=وخلوا سلوم أهل السلوم القديمات
حتى الكلام المستنع يحرفونه=وأن قلت: حرّف ليش؟قالوا:ثقافات!!
كلام خارج دارهم يسمعونه=وتقليد ماضيهم لقوا به عيابات
وحنا العرب دين ونظام ومرونه=وش قادنا لمشّكلين الديانات؟
حنا الشجاعه والكرم والخشونه=يا مقلدين أهل الترف والميوعات
وحنا خلِقنا فالبلاد الحنونه=مهبط وحي منزل ومنبع رسالات
أهدي بما قلته لمن يقبلونه=وجهة نظر تكتب على هيكل أبيات
وأن كان في قولي غلط تاجدونه=ردوا لنا يا منقدين الكلامات
وحنا نطاوعكم على ماتبونه=ليا صاروا أهل النقد عقال وثقات