بمناسبة حلول شهر رمضان أنشأت ثلاثة أبيات كمباركة بحلول الشهر الفضيل وأرسلتها لكل من احب ويعزون علي وهي كالتالي :
قالوا هلال الشهر واضح للأعيان=وبكره يصير اول أيام الفريضه
وذكرت انا من منهو له الطيب عنوان=وأرسلت له مما تفيض القريحه
الله يتمم لك بصومه وغفران=ويبلغك ويا الوجيه الفليحه
وأول الردود جأت من الشاعر المبدع علي حميدان الدجيما(أبوحسين) حيث قال:
هنيتني وانا بهنيك يا فلان=بشهر(ن) تباشر به قلوب نصيحه
شهر العباده والتطوع والإيمان=وبليس ما يحصل له إلا قميحه
وبمناسبة صومه ابا أهني انسان=وزودت من شانه رصيد الشريحه
ابن مصاول طيب الذكر لا هان=سلال اللي جعل ربي يبيحه
عنواننا صدقان وأقراب واخوان=ولا نكسب المترديه والنطيحه
ثم رد على الرسالة ثانياً جاري الشاعر هباس السبيعي(أبومسلط) فقال:
يا مرحباً ترحيبة شانها شان=برسالة اللي خصني في مديحه
ياليت لي في الحي شرواه جيران=وأعتاض عن شوف الوجيه القبيحه
اللقب أبو ضيف الله والأصل ميزان=هل الكرم وأهل الرباع الفسيحه
أمطير حمران النواظر فالأكوان=خيالهم ما عاد يبرى طريحيه
عساك أتصوم الشهر في كل الأزمان=أدعو لكم بإخلاص ونيه صريحه
ثم جاء رد الشاعر بدر بن فايز بن عجل (أبوعدنان) مستشار محمية العريق ثالثاً فقال:
عساك تسلم يا سلايل عبيان=اللي وقف لأهل القلوب البغيضه
يوم أنها فاتت على فلان وفلان=عرف جميع اهداف بني قريضه
وانت الخلف بعده على طول الأزمان=يا سيفي اللي ما رضيت بعويضه
ثم جاء رد الأخ ومستشار منتديات الموازين والشاعر عوض حاوي بن عواد(أبوحاوي) فقال:
الله يحفظك يا سلايل كحيلان=ياللي تهني بقدوم الفضيله
شهر رمضان مكمل(ن) خمس الأركان=الله كتب صومه علينا فريضه
أوصيك بالتقوى يا صقر شقران=صومه وصل وأحتسب للنفيله
أشكرهم جميعاً على هذه المشاعر الأخوية الصادقة التي من اجلها اخذوا من وقتهم للرد على رسالتي وصحت ألسنتهم
أبن مصاول