عسى الحياء يسقي الصمان=يسقيه يالله يالوالي
تردم مزونه لها ربان=وبله على الخد همالي
رجعن حقوقه على الجيان=يلطم من الجال للجالي
من الصفي لا شرى ساقان=يحز بهضاب وجبالي
حدور سيله على السوبان=كد سال ثم سال ثم سالي
تباشروبه هل القطعان=مابين شاوي ووبالي
يفرح به اللي من المطران=ليه فيه منزل ومدهالي
علوى وعباد والبرهان=طوح بها صوت هوبالي
يستاهل اللي قنا عبدان=غوالين والفحل غالي
يشدي بناته خشم حوران=درهم ودينار وريالي
مسند وغارب وخرع اذان=هدل الخراطيم وسبالي
لاذب به الريع مع عرفان=يطربك ممشى وزرفالي
ماروثنا سالف الازمان=ماضي وحاضر ولا زالي
نرعاه ونرعى من الذيدان=من كل الالوان تهتالي
في ضف من وحد الاوطان=لين استوى فيّ وضلالي
يوم الدعاوي رسن وعنان=مجند ومحزم وخيالي
شبه الجزيرة لها دخان=غادي لها هوش وقتالي
حامينها مطير في شامان=مطير حمايه التالي
لو ينشد الصلب عن عبطان=جاله مع الحزم محوالي
خلّي بضلعه عشى سرحان=دمه مع القاع شلالي
يدعى لنا بالقاء جبلان=ليا زمى دونه العالي
سقنى المغاتير مع قحطان=بوراط يوم القاء طالي
ليت الظواري لها جنحان=تنحرت للخلا الخالي
لعيون من كفها الدوشان=وغنيم يلحق بها التالي
غنيم غنيم ابن شبلان=كفى وانا اكفيت موالي
انا اشهدن الهوى سلطان=سلطان ياطيب الفالي
دام اخو نورة لنا كحيلان=داموا لنا احفاد واشبالي

م/ن