السلام عليكم ورحمة الله وبركاته ..
صباح ,, مساء الخزامى والنفل .
اليوم إن شاء الله بأخذكم في جولة مختلفة في المهرجان الوطني للتراث والثقافة
لكن هاالجولة بتكون في جنادريتي المتواضعة التي تجمع بين التراث
والذكريات ..
بسم الله نفتتح المعرض
جيبوا محش نقص شريط الإفتتاح ههههههههههه
تفضلوا حياكم الله
هذي السجادة
لها اكثر من 40 عام ورث عن جدي الله يرحمه .
في أول ابتدائي المعلمة طلبت منا نجيب سجادات عشان نطبق كيفية الصلاة .
اعطتني امي الله يحفظها هذي السجادة وهي أول سجادة أصلي عليها ولازلت أصلي عليها حتى الآن .
قبل كم يوم امي جابت لي سجادة جديدة هذي صورتها
تعزيز للوطنية ههههههههههه
قالت اخذيها وشيلي سجادتك اللي بالية خيوطها هههههههههههه تراها من جدك الله يرحمه جايبها هدية من الحج .
لها حوالي 17 سنة
هذي اول شهادة تفوق آخذها من المدرسة وأنا بأولى ابتدائي
يااااااه ماتتصورون قد ايش كانت فرحتي فيها ( والله لو إنها شهادة الدكتوراة ) هههههه
من زود الفرحة لصقتها بــ غراء على جدار غرفتنا ما غير مسنترة قدامها اشوفها 24ساعة ههههههههههههههههههه
مخطوطات أثرية هههههههههههه
هذا له حوالي 16 سنة وانا بثاني ابتدائي .
كانت معلمة القرآءن عصبية " مروعتنا " الطالبة اللي ماتفهم ولا ماتجاوب ع السؤال تضربها بالمسطرة الخشبية الطويلة على
مفاصل أصابع يدها من فوق بس الحمد لله ماقد ضربتني , كنا نكره حصة القرآءن بسبب الرعب اللي يجينا .
من زود الرعب قلت لأبوي اللي يشفيه ويطول لنا بعمره المعلمة معها كتاب كلمات القرآءن تسألنا منه ..اشتر لي مثله بحفظه عشان إذا سألتني اجاوب ماتضربني ,
طبعا قبل مافيه مكتبات زي الحين العبيكان ولا جرير كانت دكاكين صغيرة, أخذني أبوي لبيت جارنا فاتح في الملحق قرطاسية ع قد حالة اتذكر والله شكلها للحين .
اخذت الكتاب وشفت مطارة موية لونها وردي وغطاها بنفسجي فاتح وحبلها بيج مقلم بوردي اعجبني شكلها ومسكتها قعدت أتخيل شكلي وانا كاشختن بها في المدرسة ههههههههههه
قال جارنا ا الله يجزاه خير اخذيها هدية وانا عمك .. عاد ما صدقت ع الله واخذتها ههههههههههههههه .
جاء اليوم الثاني وجتنا معلمة القرآءن والحمد لله , اللهم حوالينا ولا علينا ما قومتني اجاوب .
بعد ماخلصنا الدرس قبل تنتهي الحصة حسيت ريقي ناشف من الخوف واطلع المطارة واسمي بالله واشرب مادريت إلا وذيك الصرخة القوية ( يهبي ياوجهها ما خلتني اتهنى بمطارتي الجديدة
ولا بجغمة الماء اللي شربتها )
هاوشتني لأني شربت بدون لا أستأذن منها هههههههههههههه
أول مارجعت للبيت حذفت المطارة في الزبالة اللي في الشارع وانتم بكرامة . ولاعادها الله من مطارة .
هذي النظارة اول نظارة لبستها عبر التاريخ هههههههههههههههه لها حوالي 13 سنة .
بسم الله علي والله اتذكر لحظتها وانا في العيادة كنت خايفة مرررررة ومتمسكة في أختي حسبت بيصلوحون لي عملية ههههههههههههههه .
لكن الحمد لله جت سهالات هههههههههههه ورحت بها اليوم الثاني للمدرسة كانت كشخة وقتها ( أمحق كشخة )
هذي السلة لها حوالي تسع سنين
صنع يدوي أعجبتني و شريتها من عجوز في متحف قرية القرين لاند .
محتفظة فيها عندي بالدولاب لكن بعدين استغليتها ,
علقتها في الجدار وحطيت فيها جوالي .
هذي الشنطة ورث عن جدتي ههههههههههههههههه أمزح .
لها ست سنوات عندي
الشنطة بداخلها شي
داخلها كيس
وداخل الكيس شي
( يقالك تشويييييق )
داخل الكيس مخلط ملكي جاني هدية .
هذي لها ذكريات جميلة جدا .
اشتريتها من المدينة المنورة وهي آخر مرة سافرنا فيها .
رحلتنا للمدينة ذيك السنة أسميها رحلة الضياع هههههههههههه
كل فرد من الأسرة الكريمة ضاع فيها .
الوالد نزل يدور على سكن ثم ضيّع مكان السيارة نزل من
الساعة 11:30ولا رجع لنا إلا حوالي الساعة 2:30 كان الوقت بالليل .
أنا واخواتي من بعد صلاة الفجر إلى آذان الجمعة الأول وحنا ندور مكان الفندق مقر اقامتنا . ( اثناء البحث اشتريت الشنطة والمخلط اعطاني إياه هدية معها ) " الناس
ضايعة وهي رايقة قاعدة تتسوّق " هههههههههههههههه لأن شنطتي اللي معي خرب سحابها من كثر العفش اللي فيها .
لقينا الفندق ما أمدانا ندخل ونفطر إلا رجعنا للحرم مرة ثانية عشان نلححق على صلاة الجمعة .
هذي المرة ضيعتنا الوالدة في الزحمة هههههههههههههههه
مالقيناها إلا قبل صلاة العصر ههههههههههه .
صراحة كانت رحلة جميلة وذكريات حلوة .
هذي جديدتن قديمة لها حوالي ثلاث سنين عندي .
جابتها لي اختي فديتها تعرفني احب الأشياء القديمة ( عجوز ) هههههههههههههه
هذي جنادريتي المتواضعة اتمنى تكونوا قضيتوا فيها أسعد اللحضات وامتعها .
وأن تكونوا استفدتوا من المقتنيات والمخطوطات الأثرية هههههههههههههههههههههه التي قدمناها لكم .
" وجيه عوينه من تلفزيون المملكة العربية السعودية القناة الأولى "هههههههههههههههههههه هذا الظاهر من قدام اطلع على الدنيا وهو يقولها في الأخبار ."
مخرج :
خابرينن صابرينن على الحرب الطويل
كل ماطال المدى زاد فعل رجالها
لابتي بالكون تفرق خليل ن من خليل
باالوغى رجليها سابقن خيالها
نزف المشاعر