هذه الأبيات قالها شاعر المدالجه الشيخ/ضيف الله بن زراق بن مدلج بعد وفاة المرحوم بإذن الله تعالي /نوار بن عامر الدجيما رحمة الله عليه حيث كن بعض النسوة ذهبن لتعزية زوجات الفقيد وبناته وذكرن أن الكبيرة من البنات الصغار من زوجته الأخيرة كانت شديدة البكاء والتأثر لوفاة والدها فقال هذه القصيدة عبارة عن تعزية ومواساة :
يا بنت
يابنت يا اللي عقب غاليك تبكين=لعل من لامك تليم همومه
حنا بعد والله حزانا وباكين=عقب الخبر جانا وجتنا علومه
وانتي على فقد الأبو ما تلامين=والأبو ما يغنون عنه العمومه
الأبو عز أبناه في العسر واللين=يرخص لهم نفسه ويبذل عزومه
يسهر اليا صاروا سقاما وشاكين=ويطلب لهم ربه يحقق حلومه
ويفرح اليا صاروا صحاح متعافين=ويسعى لهم بالرزق ليله ويومه
من يحجد الوالد ردي اصل ولعين=ومضيعن حق الأبو والأمومه
قلته وانا عندي دليل وبراهين=والموت سنه والنفوس محكومه
والناس لو عاشوا بعض وقت ماشين=ليا جاء السفر كلن صحى عقب نومه
راحوا من الدنيا خفافٍ سريعين=وبيوتهم عقب العمار مهدومه
الأنبياء واهل الرتب والسلاطين=وهاك القرون اللي مضت ومعلومه
ماكنهم داجوا على الأرض حيين=واثارهم في الأرض ضاعت رسومه
كم راحت الدنيا بناس عزيزين= أخبارهم عقب الوجود معدومه
راحوا وخلوا باقي الشغل عجلين=والكل منهم ما أنتها من لزومه
يومٍ بعض الناس يمشون لاهين=والموت قافيهم سريعٍ هجومه
كم مرة جاهم صباحاً وممسين=وليا قضى منهم سريعٍ هزومه
وحنا بحكم اللي بنا العرش راضين=والموت ذا طبعه وهذي سلومه
والراحل اللي راح مع درب غالين=قدمه هله واولاد عمه وقومه
ونطلب من اللي كون الخلق تكوين=يكتب له الجنه ويحسن ختومه
وصلوا على اللي علم الناس بالدين=عداد من شاف القمر مع نجومه
رحم الله الشاعر وقد أصاب كبد الحقيقة عند قوله:
الأبو عز أبناه في العسر واللين=يرخص لهم نفسه ويبذل عزومه
فلا يعرف قيمةالأب إلا من فقده وبان وجود الأبو عز وانه يرخص لهم الغالي والنفيس كي يكونون في أتم سعاده
أبن مصاول : رحم الله نوار بن عامر ورحم الله شاعر المدالجه الكبير ضيف الله بن زراق