من قصائد الشاعر , وفي موقف مع الشاعر المرحوم عبدالله العير ,
يقول العير مسنداً القصيدة على شعيل :
ياشعيل لو شفت الثلاث المفاريـع = بالدبدبه بيـن الحفـر والزوامـي
طرقن يطقن الظبـى بالاصابيـع = هاك هالخشوف اللي سواة الادامي
الراس لاهبـت عليـه الذعاذيـع = قام يتفرق مثل ريـش النعامـي
الى أن قال العير حمه الله :
خذت من مبسم حداهـن قريطيـع = يـاالله لا تكتـب علـي الاثامـي
وإن رحت للعجرم سلم على جديع = سلم على الغالي كثيـر السلامـي
فرد عليه الشاعر شعيل بهذه القصيدة :
شفنا ياعبـدالله وعشنـا مواضيـع = ومجاوبين أصوات ورق الحمامـي
اللي على خضر الغصون المهازيع = يدعن عشـاق الطـرب والغرامـي
في ليلتن زلت لنـا قبـل أسابيـع = يوم القمر نـوره تعلـى الظلامـي
حيث اجتمع شمل القلوب المواليـع = بعد البطـى ومناوشـات الكلامـي
في وادين عله مـن الوسـم تنقيـع = يعطيك ريحة نبت وأمن وسلامـي
يبعد هواجس ضامـرك والتلاكيـع = وتحس فيـه براحتـن وانسجامـي
لولا فجيعة روعتن وقـت توديـع = تذويك ذوية مخضـرات النوامـي
يوم اخضرت وبدى الثمر بالطواليـع = يبس القليب وشيل عنـه المقامـي
مثلـه وداع مدلهـات المراضيـع = نجل العيـون قضيفـات الافامـي
سخاف الملامس لايقات المقاطيـع = محاليات اوصاف ظبـى العدامـي
يعطن لمحة نظرة اعجاب وتضيـع = لو قلت مالي في المـوده مرامـي
شبك الوحش من نايفات المرافيـع = وشبك الاوادم نظرتـن وابتسامـي
تشكي علي اسباب ضيق المسانيـع = وانا طريح افراش يابن الحشامـي
صريح ماني باصنع الهرج تصنيـع = ابحث عن الاسباب وانشد علامـي
رجم الفياض المخليـات المرابيـع = يعطيك عنـي ماحصـل بالتمامـي
وجديع مالـي يـم نزلـه مراميـع = انا جنوب الـدار وجديـع شامـي
وان رحت قله ماورى الوقت ترجيع = زل الطرب والجرح بالجاش دامي
وغزلية أخرى للشاعر شعيل :
ياروح روح الروح لاتظلم الـروح = مامن الفراق وهجر الأحباب راحـه
قدر الغلا في ناظر العين مفضـوح = قـدام أقـول و تستغـل الصراحـه
مادام قلبـي بالغـلا شيـك مفتـوح = ليش ببحـر حبـك تمـن السباحـه
لاتظلم اللي مـن تغليـك مجـروح = دمع العشيق مـن الظليمـه سلاحـه
مانته على الهجران والصد مسمـوح = يامن علـى زينـه تزيـد الملاحـه
ماشفت مثلك في حلا البيض مملوح = ياطـب قلبـي ياسبايـب جراحـه
سبة غلاك مصخر الشرد مطـروح = كسرت في سهـم التجافـي جناحـه
كان النصيب اللي كتب له على اللوح = فرقـاك الآ ونكبـتـه وصبـاحـه
الحب بحرآ مغرقـن كـل سابـوح = قـدام عصـر العولمـه وانفتاحـه
ياروح روح الروح لاتظلم الـروح = مامن الفراق وهجر الاحباب راحـه
وقصيدة رد على بعض من لامه في أمر ما :
ياعاذلي ساعة ندم فايت الفـوت = ليت النصيحة جاتني منك بـدري
خلاص فات الفوت يارافع الصوت = خلني على مافي ضيّقت صـدري
البحر ماخفا درةٍ في بطن حـوت = أنا آدمي ٍ بيـح الوقـت صبـري
يشوتني ظرف الزمن بالقدم شوت = وغيب السنين المقبله عنه ماأدري
أجاهد الدنيا علـى لقمـة القـوت = والعمر فاني والمقاديـر تجـري
مشموت لا قلّت محاصلك مشموت = لوماقصرلك عن هل المجد شبري
كم واحدٍ قصره من الخام منحوت = معدوم طيب وله معـزه وقـدري
من حشمة الدنيا له القدر مثبـوت = كلٍ بمدحـه بالمجالـس يهـذري
شيخ الزمان اللي به الحبل مفلوت = لو راد وقفات المناعيـر يـزري
الوقت غيرالوقت يارافع الصـوت = خلني على مافي ضيّقت صـدري
والمزيد من قصائده لاحقاً ان شاء الله .