سوار الذهب :
هلا مرحبا ترحيب ياخذ سنه ماطاف = واسويه من قلبي وأغنيه بلساني
يقولون وش وصّل عتيبه مع الاشراف = كبن العطاوي متصل بالعطياني
شبيب :
يدوم البقاء يالشاعر اللي بدعت القاف = هجوسك تلحنها على كل الالحاني
عتيبه قبيلة عز تدري بها العراف = والاشراف من خندف وفالأصل مطراني
سواار الذهب :
ليا ضعت بين البير والدلو والغراف = احدك على الأول وأردك على الثاني
لقيتك يابو صافي من الصوف للصفصاف = وانا رجل سلمي سلم ابويه وجداني
شبيب :
تراني مادان الرجل يدخل مع الاطراف = والأول والآخر مالها غير ميزاني
أشوفك ياعبدالله تحط الثقال خفاف = وأنا خايفٍ انك لابسٍ ثوب نصراني
سوار الذهب :
خطا ماتقول وكل عمله لها صراف = أعنيك بالطرقه ولا أشوف لك عاني
جناحينك أصغر منك ياطير ياخطّاف = وابا اجيك واشتالك على روس جنحاني
شبيب :
مادام انت خصمي فالبلد ماعليّ خلاف = أقومك مجاني وأقعدك مجاني
ليا شلتني يمكن يودونك الاسعاف = وتصبح خساره للجماعه والاخواني
سوار الذهب :
والا ياشبيب اخفض كلامك تراك خلاف = هذا آخر زمان أنته ومثلك تحداني
نصيبي يضوي من عتيبه هلل وانصاف = يجيبون بطحاني يودون بطحاني
شبيب :
تجيب العلوم كبار والفعل ماينشاف = وانا ماتحدى غير ذرفين الايماني
نصيبك قعد لك فالخلا ماعليك لحاف = تدرمح عيونك مثل عين الكرواني