بسم الله الرحمن الرحيم
لا شفت شعرك مارفع هامتك فوق=واغناك مثل الهاجري وابن جدلان
خله ولا تكتب من الشعر منطوق=وش لك بمنطوقٍٍ له الياس عنوان
وش لك بشمسٍ لابدت مالها شروق=وش لك بنورٍ بان غيره ولابان
وان حافك الهاجوس واشتقت له شوق=والفكر صار لفتلة القاف عطشان
مونس غبينه اوتذكرت معشوق=والا؟ وخذ لك حق ظلمٍ وبهتان
افتل لحالك فالخلاء كم طاروق=وخل الطيور تردده فوق الاغصان
خل العقول تروق والنايم يفوق=ومن كان غافل فرصته يفهم الان
ان كان جمهور الشعر يفهم الذوق=الذوق مايحتاج له عود فنان
والا؟؟بلاش؟من الخلا؟منت ملحوق=خلك قريب وجرها عزف واللحان
وهذا شنبي؟ لصغالها أي مخلوق=لوكانت حروفك تذوب الها الاذهان
مالك على قلوب الملا صك وحقوق= حتى ولو تشكي على حقوق الانسان
لاصار مالك صيت عالي ومرموق=والا كريمٍ تجزي الفضل باحسان
او كان من تحت الثراء مالك عروق=اقفا زمانك مثل عاداته وشان
ودنياك صارت كلها عوق في عوق=والحال صارت كل يومٍ بنقصان
ان طعتني خلك ورا الضان والنوق= ماهو قصور فيك من غير حقران
وانا بعد شرواك مابيننا فروق=شاعر سواتك رايحٍٍٍ في خبر كان
اشوف بعض الناس لامر بالسوق=كل الاوادم ياخذونه بالاحظان
لو كان ماله بالشعر عهد ماثوق=معيشٍٍ نفسه على قولة فلان
قلته وانا اللي سقت جزل الشعرسوق=شعرٍ ماهوب احيان في كل الاحيان
ياما وياما لاح من فوقي بروق=وياما بكت من سطوة حروفي اعيان
وان كان جمهور الشعر يفهم الذوق=الذوق مايحتاج له صوت فنان