بسم الذي ينشي مراويح الأمزان = الواحد الفرد الصمد مبتداها
ومن بعد ذكره باغن أقول ماهان = من هاجسن صاغ البيوت وبناها
تعبير عن نفسي على قدر الامكان = ووجه الجابه اليا منتهاها
يم الأمير اللي كما البدر لابان = اللي طواريق المحلل مشاها
سلمان ملفى العلم مانيب غلطان = شيخاً صعيبات المراجل رقاها
لو توجعه يمناه في بعض الأحيان = مخطور يقطعها ليا من شكاها
هذا وللأمثال ياامير ميدان = والناس تعرف عن قداها وخطاها
والحكم ماجاكم من فلان وفلان = ماجاكم الا في مصادم عداها
مصادم سباعن وافاعي وديبان = ومعاركاً دار ابو تركي رحاها
معاركاً ضمّر بها كل فسقان = تشهد رمال المملكة مع حصاها
ياما نطحتم عندها كل فرسان = فوق المهار اللي تسالس حذاها
في ساعةً فيها يروغن الأذهان = ياما رميتوا للضواري عشاها
ليا اختلط عج السبايا بدخان = يوماً بها العوجاء يزعزع نداها
بقيادة المرحوم ابوكم كحيلان = سبع الجزيرة يوم يصفق هواها
عبدالعزيز اللي على نجد سلطان = اللي فلا مثله ظهر في وطاها
احيا تراث اجداده اللي بالاكفان = بيمنن عسى الجنة تلقا عضاها
سطواته الأولى على راس عجلان = وحول على ترك الحساء في حساها
واسترجع الملك الذي قبل عدمان = وحدود جده حط حده وراها
من الخليج اليا جزيرة فرسان = ومن حد الأردن ليا شروورة ولاها
خض الجزيرة خض باخلاص وايمان = وقضى على الفتنة وفلشّ عصاها
وصار لهلا الفتنة كما الذيب والجان = اليا قضبه الذيب خيب رجاها
يوم انصره ربي على كل من كان = عف وعفى عن كل ناسن ولاها
وخلى جميع الناس صدقان وأخوان = وجميع خملات القبائل نساها
ومن فضل ربي عقب الحر عقبان = عقبان والله مايقربّ حماها
من الكبير اليا صغيرين الأسنان = مثل الجبال اللي يلاذ بحجاها
وانتم هلا المعروف والعدل واحسان = وانتم حجاب المسلمين وذراها
وعضودكم فرسان نجداً بالاكوان = فهود الزراج اللي تضد حدداها
ماهم بأهل خونة طليقين الأيمان = وانتم جسدهم والجسد من عضاها
والملك لله ثم لكم سر واعلان = وعين العدو ياما سحنتم دواها
وياما شبع في فضلكم كل جيعان = من ناس مختلفن لك الله لغاها
في ضفكمم شبعوا هل اسنان وعنان = وشبعت طيوراً قبل يوكل عشاها
تعطونهم عطفاً بلطفاً بسفطان = مافيه يمناً ماخذت ماكفاها
من عدلكم كلاً من الخير شبعان = جميع رعيان الوطن وومراها
والعجز والرمّل ومن كان عجزان = لازم يجيها شونها في قراها
ومن المشاريع الذي تحيي الأوطان = قمتوا بنهضه شعبكم ماهقاها
حتى الغنم والابل مشي لها اضمان = شبعت وشبع الراعي اللي رعاها
وان كان ماصاب أكثر الناس طغيان = والا الحكومة ماش دولة سواها
ياسيدي ياابو فهد طير حوران = حماك من يرسي النجوم بسماها
الناس مارضيت على عالي الشان = اللي خلقها من مهين وعطاها
سمع وبصر ولسان ينطق مع اعيان = وفي احسن التقويم سير خطاها
عصوه بعض الناس في كل الاحيان = وتجاهلوا بآيات عما وطاها
وقالوا نبي الله ساحر وفتان = ثم جاهدت نبيها اللي هداها
وشلون ترضى مثل شلة جهيمان = المفسدة في البيت نالت جزاها
جاها جزاها بين زمزم والأركان = في ساعةً جبارةً ماوراها
والمملكة ماجت بلعبات ورعان = جتكم بصولاتً بعيداً مداها
ومعاركاً يشبع بها الذيب سرحان = فيها سيوف الهند يوضي سناها
فيها سيوف الهند تاخذ الها اثمان = جماجم الأعداء عشاها وغداها
يغدي بها رقاب النمش تقل غدران = والدم يكسي وجهها مع قفاها
يالفيصلي يابعيد الأذكار سلمان = ياللي مطاليعك بصعدة علاها
ياسيدي تسمح بكلمة ونيشان = نيشان معنى كلمتي وامغزاها
ليا صفيتوا ياآل فيصل على لان = عدوانكم قامت تقصّر خطاها
وانتم سراج الحق للعدل ميزان = وانتم سيوف الله على من عصاها
والحكم مايعرف بني عم واخوان = اخوه من صافاه في ملتقاها
وأخوكم الصافي هو السيف شامان = والا حثال الناس فيها بلاها
ليا قطعتوا راس مفسد وخوان = المفسدين امست تراعد لحاها
والصبح قام الذيب يرتع مع الضان = ويقرر النعمة ويعرف حلاها
تمت وصلى الله على نسل عدنان = سيد قريش اللي هداها وجزاها