لاطالعوها قلت:تكفون ياعيال

عهدي بها من قبل تلبس عبايه=وأنا بعد قبل البس شماغ وعقال!!
طفلين نتهجّى حروف البدايه=الله ياماأجمل سواليف الاطفال!!
كانت لنا في كل شارع حكايه=وكنّا نقول علوم ماهيب تنقال!!
وكنت اتقاسم مامعاها معايه=من(عسكريم) التوت,للعلك ابوريال!!
وكانت بعكسي شاطره بالقرايه=تقرأ جزو عمّ وطه والانفال!!
وأنا لك الله من مواري غبايه=مدري ابو نقطه هو الذال او دال!!
وكانت لابويه تشتكي من شقايه=وتعلّمه كيف اربط الباب بحبال !!
ياما على ظهري كسر من عصايه=يقول لي:خلّك وأنا ابوك رجّال!!
وامي تقول:ادع لولدك الهدايه=خوفي تصيبه كثرة الضرب بهبال!!
لاشفتها مع اول الدرب جايه=مدري أنا اللي ملت ولاّ الوطا مال!!
احسّ قلبي يرتجف في حشايه=ماكنّه الاّ الضيف لاهزّ فنجال!!
ياما عن"السّعلي" تخبّت ورايه=لاخوفوها فيه ثم شافت ظلال !!
تقول:خلّك ياحبيبي معايه =واسّتأنس العب عندها دور الابطال!!
وآغار حتّى من عيون اصدقايه =لاطالعوها قلت:تكفون ياعيال !!

يقال أن شاعرها محمد النفيعي


أبن مصاول

مشكور اخوي ابن مصاول على القصيده الجميله

لا شكر على واجب اخوي بن صحران وهذه القصيدة من اجمل القصائد البسيطة غير المتكلفة التي قرأتها في حياتي

اخوك ابن مصاول