سلطان بن عادي الديحاني وشاعر المليون

قصيدة للشاعر سلطان بن عادي الديحاني المطيري في مسابقة شاعر المليون قصيده جزله واعجبتني تستاهل عيونكم

من عاصمة دار الكـرام اليمامـة=اطلق بنات افكار شعـري دواويـن
بصدح بصوتٍ يصطفق في تهامـه=ويردّلي صداه موجـك يـا داريـن
دارٍ ليا جـا المـدح فيهـا فخامـه=الله يخليهـا لنـا قـولـوا آمـيـن
وانا أعـرف الـدرب والإستقامـه=والشعر ماهو بس ضمـه وتنويـن
الشعـر ابعلـن ثورتـه وانتقامـه=وادري كثير الناس ماهم براضيـن
الشعر راقي بـس قـل احترامـه=وانا احترمته في صدور وعناويـن
مدام روض تروّضـه فـي لجامـه=واللي بعد قاسيـن ماهـم بقاسيـن
وبضرب مثل عن اختبـاء النعامـه=مابين ابين ..وبين مابيـن .. وابيـن
واببحث اسباب المرض وانفصامـه=وابركي المخطـر طبابـه وتمكيـن
الشرنقـه لومـا كبـابـه كـلامـه=لكن قلنا مـن فـروخ الشياهيـن
مسربٍ شبحـه ومرخـى خطامـه=ياصف على المهدي بليـا براهيـن
لاشك ضاع وضاع منـه التزامـه=وامسى يحب ايدين ويصافح ايديـن
ببيـن الواقـع واكـب الوهـامـه=واذكر الناسين عن فـارس الطيـن
دوّر سلامـه يـا مـدوّر سلامـه=دام الخطوط تصب في خط برليـن
في شهر ذالحجـه وكـلٍ حرامـه=لفّـه علـى متـنـه ولله ملبـيـن
وانتـم علـى منتـم وكـلٍ نظامـه=في مسرحٍ سارين ياليـل يـا عيـن
واللي يجي في درب لوم وملامـه=لابد له من خـطٍ احمـر وقوٍسيـن
وانا بحـدد كـل شخـص ومقامـه=لا صار ماله غيرةٍ مع هـل الديـن
غيرة وطن ماهـي بغيـرة هلامـه=اللـي جماهيـره بنـاتٍ مزايـيـن
ويا ناشـدٍ سلطـان تنشـد علامـه=ادري سؤالك سيف والسيف حدّيـن
وجهة نظر ولكـل رجـلٍ مرامـه=وانا ليـه وجـه ولاهـو بوجهيـن
تقـول يـا سلطـان ذب العمامـه=شارك وخذ لك سجةٍ مع هل العيـن
ابشـر بكـاشٍ يجبـرك بإستلامـه=حاضر بحاضر جاك ماهـو بعديـن
عن شاعر المليون جزنـا شهامـه=شيمة عرب تبقا على العسر والليـن
وعن بو ظبي عندي طعوس الثمامه=تسوى دبي وابراجهـا وام قيويـن
ياشاطـي الراحـه سمينـا قرامـه=جوايزك من صرف خط المساكيـن
وش عاد وااللجنة مسج واستلامـه=الله مغنيـنـا وعنـكـم غنـيًـيـن
نسمى مـادام لكـل نبـلٍ سهامـه=ونصيب في مرمى الهدف والنياشيين
الجايزة.. جوايـز اهـل الزعامـه=ماهـو بمليـونٍ عطاهـم ملايـيـن
آل السعود ان كـان للمجـد هامـه=حكامنـا بالعصـر الأول وهالحيـن
اعلـى شـدادٍ قاضبيـنٍ سنـامـه=حلوين .. للحالي .. وللمر .. مرين
لاثارعج الحرب وارهـى عسامـه=للسلم .. سلم .. وللحرايب سلاطين
عدوهـم عجـزت تقلّـه عظـامـه=يشرب قهر لوهو بخضر البساتيـن
ودخيلهم يرقـد رغـد فـي منامـه=لو ان طلابـه .. ابـوشٍ وبوتيـن
وحنـا .. ولانـا قاضبيـنٍ زمامـه=لا ما نبعيه لاجـل رنـجٍ وشيكيـن
واخر كلامي خاتمـه فـي ختامـه=الله يثبتهـم علـى الحـق والديـن

أبن مصاول: أشهد انه صدق في أكثر ما ذهب اليه

السلام عليكم ورحمة الله وبركاته
مشكور يابن مصاول ولكن هل أنت متأكد من أسم الشاعر
الشاعر أنا أعرفه شخصياً وهو صديق الطفوله لي
هو سلطان بن حسين بن عادي الديحاني
والده حسين أبن عادي أمير حفر الباطن سابقاً
وشقيقه الدكتور عادي بن حسين بن عادي عضو المجلس البلدي في حفر الباطن

والله انا ما اعرفه شخصياً ولكنني بحثت عنه في النت ومن بعض الأصحاب وقالوا لي بأنه حلفي عوني...ولكن هل صاحبك الشاعر الذي تقوله هو صاحب هذه القصيدة أعلاه التي انتشرت في النت العام الماضي؟؟؟

والله ما احسن من الحلفي ما ادري الديحاني اللي جابك لنا يا ابن جويبر.

نعم أنا أعرف أن القصيدة منتشره بالبلاتوث والنت
وهي للشخص اللي ذكرت أسمه لك بالكامل ونا واثق كما أني واثق منك يابو ضيف الله

الله يسلمك قسم بالله مارحتو عن بالي ولا دقيقه بس أستحيت لا أقول لك أني كنت مضيع الرقم السري من جديد خفت أنك تقول أبن جويبر فاقد الذاكره هههههههههه