ابو سلطان المطيري :
هلا يامرحبا عدّ مبدا نجمة سهيل = توكلنا علـى الله ويمتنـا شمالـي
عيون البدو ياصاحبي مثل الدرابيل = يخيلون السماء لو مافيهـا خيالـي
هامور مطيري :
عيال اصعيب منا وفينـا يارياجيـل = وانا هذا محلي فالأولـى والتوالـي
يكفيني من البدو شمس المجد والخيل = وانا مادري على غيرهم وين احتمالي
ابو سلطان المطيري :
يمينك حطها فالشحم والبن والهيل = انا وانته من مطير وأحلالك أحلالـي
ترانا قد شربنا من سنين الفناجيـل = وذقنا المرّه امن الزمن وامن الدلالي
هامور مطيري :
ثلاث سنين ماعلّمت عنـك المراسيـل = وحنا مانبا الا الشجيـع امـن العيالـي
عسى الطيّب من مطير يلقى له مداخيل = وهاذي ماتجـي بالجنيـه وبالريالـي
ابو سلطان المطيري :
انا الليله معزبك وانت امن الحلاحيـل = وابا اطيبك بالطيب ياسمـح القبالـي
لك الله عزنا باقيٍ جيـلٍ ورى جيـل = وانا بشري وابيع بشرف من حر مالي
هامور مطيري :
والا يامصر وش يعني الخرطوم للنيل = متى الايام تكشفـك ياسـود الليالـي
ليا جت للحقيقه وكثر الحط والشيـل = انا محتاجكم غير فالجـو الخيالـي
ابو سلطان المطيري :
الا ياسدرةٍ فالنهار اشتالها السيل = اثر ما فيك ظلٍ لمن يبغى ظلالـي
انا رجّال تضحكني اعقول المهابيل = ليا قمت اتفكـر اقـول الله والـي
هامور مطيري :
لايدخل روحك الياس من قل المحاصيل = ترى الله مايخليك يالـراس النضالـي
سنه والا شهر وش تـورى فالمقابيـل = علشـان الحقيقـه لايذبحـك الجدالـي
ابو سلطان المطيري :
بعد بكره يبا يجيك تقريـر التحاليـل = ويطلع بك ياهامور حجم الضغط عالي
على صكات بقعا ماعاد اظن بك حيل = لو ان الله عطى لك صبر شهب الجمالي
هامور مطيري :
انا احرقت الجرايد وحرمت المواويـل = وذا كله من اسباب راعيـن المقالـي
تذكرت ابرهه يوم جا يمشي على الفيل = لكن اليـوم مافيـه حـرب ولا قتالـي