هذه ابيات كتبتها في الشيخ عبدالرزاق الحمياني (ابومشعل)

هذه ابيات كتبتها في الشيخ عبدالرزاق الحمياني (ابومشعل)

وهي لاتفيه حقه وبيض الله وجهه في مواقفه المشرفه لقبيله مطير

لك جل الشكر والتقدير ياراعي مهرجان شعراء مطير

فالقصيده عتدما تكتب في رجل مثل ابومشعل تعجز الكلمات والحروف تصل الى منتهاها
ولا تفي ابو مشعل ربع حقه علينا

من غير قصور فالجميع

اخوكم
الشاعر
حميد الشطيطي





راكب اللي لاشتغـل ماتسمـع الا نسنسـه
سايقـه فـر السويـك ويحسبنـه طافـي
صنَعه شايب خبيـر ومحتـرف بالهندسـه
والمساعد خبرته عشريـن عامـن طافـي
جيب لكزس وقفته فيها شموخ وغطرسـه
كنـه يقـول المواتـر كلبوهـا خـلافـي
البلوف اليـا دعسلـه سايقـه ثـم اكبسـه
تخلط البنزين مع ريـح الهـواء الصافـي
والبواجي شغلهـا مـع سلكهـا ماتعفسـه
استلـم منـي واسلمـك الشـرار الكافـي
والسلندر لعترض راس الشـراره والمسـه
امترغ مثـل امتراغـه واحـدن متعافـي
وابترم ويله على خـط المدينـه واكنسـه
كن نـوره نـور بـرق فالمـزن كشّافـي
فرخ ميراج شكى من سرعته صوت جرسه
يقهر اصحاب الجموس ومقتنيـن الهافـي
كن عينه عين عذرى واسعه فيها خرسـه
طاهره ماتطلب الله كـود ستـرن ضافـي
كن دمعات اليتيم بوسـط عينـه مرمسـه
ماتت امـه عقبهـا مافيـه حضـنٍ دافـي
نحّره للي وقـف للطيـب ياليـن اجلسـه
في محلـه العـز عنـده ماعليـه خلافـي
مدرسه فالطيب ابو مشعل وكفو المدرسـه
كل من جاء لك يعد الطيب واللـي شافـي
كل واحد من مطير اليـوم فعلـك نومسـه
ياذخر من بان جـوده والسنيـن عجافـي
الكرم ينبيك في كثـر الضيـوف بمجلسـه
بكل وقت معزب الضيفـان عنـده لافـي
مهرجان الشعر شلتـه بالعـزوم وتقبسـه
نور مايخفى بعـد وهـاج نـوره خافـي
ولو علم قلبي عنه مافاتنـي ريـح نفسـه
جيتكم شاعـر مشـارك والنوايـا نظافـي
جعل يفداك الردي واللـي فعولـه دنفسـه
ياعريب الجد فعلـك وانـت كلـك وافـي

صح لسانك ياحمد الشطيطي

وبيض الله وجهك قصيده وافيه وجزله من رجالن وافي

ويستاهل ابو مشعل الطيب على جهوده المبذوله

ولاهنت يالقرم

يستاهل الطيب

الله يعطيك العافيه