أنا ليا ضاقت عليّ المحاريف = انصى الرجال اللي تسد النوايب
تزبن عن الضدات تذري عن الحيف = ضلعٍ يذري عن سموم الهبايب
لطامة العايل كبار المعاريف = روس الرجال اللي تفك النشايب
لاجات دقلات الليالي مواجيف = وناخت على روس ارسنتها الركايب
تنصى العلوم متعبّين المواقيف = أهل العقول موردت كل هايب
أمثال أبو خالد بعيد الأشاويف = الصيرمي منتول من راس شايب
أكرم من الهتان وأمضى من السيف = والطيب فالطيب من الله وهايب
رأسٍ زما فوق الجبال المواقيف = ماهو بحيا الله عرب فالقرايب
قوم الهزال مجمعين السواليف = الخايبين مليمة كل خايب
ياعيد زبنّي تحت بارد القيف = قدام لاتركز علي النصايب
والا بخلي نجد زعلان ومعيف = أنجع وأهاجر مع وساع الخبايب
نجعة مطيريٍ هجر نجد لجنيف = زادت غرابيله وشاف الغرايب
خيلت لي نواً مزونه مراديف = وأقفى بماه وراح ماهو بصايب
أن احسبنه صيف واثره ماهو صيف = كنه وعج وراح مزنه نهايب
وأن مالقينا للسفينه مجاديف = أقفى بها موج البحور الشوايب