يانفس لاتشكين من كثر المشاوير الطوال=لولا المشاويرالطوال يطول همي وتعبي
ليادقت هجوسي وجاء للهم فالصدرإجتوال=وجلست احسّب وش ماآباء ووقفت احسّب ويش آبي
شديت للممشى حبال العزم واسلاك الوصال=بس المهم اني ليا روحت حققت طلبي
على امريكي(ن)ماصاغ سرندله ظنوة حلال=جميع مافيهEnglishمافيه لو حرف إعربي
الفورد رافع مقدمه سمح القبال=كنه يقول أرّحب للسواقه مشبب ياصبي
لياأشتغل كنه يقول لسايقه هات الريال=وليا كبس له تمتمت كاهن فقيراً مغربي
ماوالله أزين مشيته متنحره غيمة خيال=يسيّل الشعبان والضلعان يقباها قبي
ريح الثرى ياصلك قبل الوبل والحايه شمال=والبرق يشخط فالمزون اللي مثل برق العبي
وقام يتخابط فوق كبوته كبر عين الغزال=وبل السحاب اللي يجي وقعه كبر عين الظبي
ينزاح عن صدري هموم وضيقة(ن)كبر الجبال=مصايب(ن)لوجت على عقل الذكي يصبح غبي
كنيتها فالصدر لاينقال عني ويش قال=وأخفيتها عن خيرة أصحابي ماهو بالآجنبي
من لاتحمل شيل سره كيف يشتال الثقال=ومن لاتزهب من زهاب الصبر ماله مزهبي
هذا وأنا ماني مدور لي على شي(ن)محال=أمشي على كيفي وتصريفي وأدور مطلبي
ليا بدالي لازم(ن)كنه يقول أقبل تعال=وأجي مجي الذهبي لكن ماأضيع مذهبي
ماني مثل ناس(ن)يطشون العمامه والعقال=يهزهم صوت الكمنجه والطبل والمطربي
أهل الوجيه اللي تميل مع الطمع من حيث مال=ياهبي ياهاك الوجيه المدلهمه واعقبي