أخواني وأخواتي في هذا الصرح الشامخ
إليكم قصائدي في ابني عزام أصلحه الله وهداه طريق الجنة
هذه الأولى قلتها بعد مارزقني الله بخمس من البنات ( الله يحفظهن ويصلحهن )
كما هي فطرة الانسان يريد ابناء ذكورا واناثا
يا حرف وينك ما لقيتك فالحروف=اليا كتبتك شفت غيرك ينقري
سطّرت صفحات العمر ظلمى واشوف=وش فايدتها دام مانت بْدفتري
ملّ الصبر وانا انتظر رغم الظروف=واللي يبى جزل المعاني يصبري
ودي تناديني وانا اجيلك شغوف=لو القصايد تمتلي شوك وشري
لا جيت لي خليت شعري لك هنوف=مضمونها عقل وعلاها الجوهري
ويرقص جزيله لك بلا دق الدفوف=لا زان منطوقك وجوّك شاعري
نلعب سوا نبني على صفّ الرفوف=عذب القصايد تبتدي بْحرفٍ طري
ولاشْتدّ ساقك واقتوى وصرت مْعروف=وصيتك ظهر والنّعم بالحرف الجري
اتْصير سيفي لا قْدحت بيض السيوف=وحبر قْلمي على الفخر مبري بري
وكفي بكفك لا بْخلت بعض الكفوف=يا غيمةٍ بك اسْتظلّ وتمطري
وتنهض قصيدي لا ضعف فوق الكتوف=لا شاب قاف الشعر ماله مقدري
واظلم زمانه من خسوف اليا كسوف=بين المخاطر حالته ماتنطري
وانهدّ حيله ما بعد ربّه خلوف=الا انْت شدّ الحيل مالك معذري
وردّ الديون اللي كست بيض الكشوف=واشفق بحاله كان ودّك تجبري
اليا انكسرت وصرت تطمع للوقوف=واللي قضى دين القضا مايخسري
هذي حروفي حرفها حرٍّ خطوف=حرٍّ على صيد السمين مسيطري
حرفٍ عليه من الجزاله لي وصوف=عزام بن عبد العزيز الشاطري
واخْتامها واللي خلقنا بْلا لحوف=ماني لغيره رافعٍ له ناظري
يالله ما بين الرجا وما بين خوف=عبدك دعاك ورافع ايدينه عري
يدعوك في وقت السحر وانته تشوف=ربّ استجب له وارزقه حرفٍ جري
وْصلاة ربي عدّ من حج ويطوف=على النبي شفيعنا فالمحشري
وهذه القصيدة الثانية بعدما رزقني الله باثنتين اخريين ( الله يصلحهن ويحفظهن )
الوقت يا عزام بانت غوايبه=نوّخ بلا اسْتئذان مني ركايبه
كشّر عليّه بالمناشير كمّلت=طوقٍ على عمري ولاني بهايبه
عزّيت نفسي فيك وارثيك وانتظر=يوم الفرح بك لا تحقّق مناي به
بعد النجوم السبع والدار نوّرت=المنجية باذْن الولي من لهايبه
يابوك ما شفتك وانابوك مرتجي=من ربي المعبود معطي وهايبه
للي توجّه بالدعا له ويطلبه=ماردّ نفسٍ تدعُ باخلاص خايبه
عيني تمنّى بعد هالعمر شوفتك=واذني تبى اسمك تسمعه في نداي به
عزام سخرت الهلالي وانا اقدره=ماهمّني لكنّ بك حل غايبه
عسفت من خيل القصايد أصايله=واسرج حصان الفكر وانصى غرايبه
وارفع مقام الشعر وارقى نوايفه=ماورّده ميراد بانت شوايبه
ولاسْمع هزيله وانكر اللي تقوّله=وامشي مع اللي للجزالة طلايبه
لا قلت شعري كل الاوادم انصتت=يسحر مسامعها على فنّ جايبه
لا صوت جنّنها ولا لحن من غنّى=شعرن معانيه الفرايد سحايبه
اليا تراكم بالسما ... ليل تدحمه=مدّت له الصحرا كفوفٍ عطايبه
تستفزع ولبّى لها البرق يلحقه=رعّاد سوطه فالثقيله ضرايبه
طاحت تباكى والصحاري تصدّعت=تنثر مع العشب الورود فهبايبه
ثم اضحكت والروض تشدو نسايمه=قامت تلاعبها وسالت لعايبه
وغنّت لها طْيور الفرح يوم عيّدت=وقامت تراقص كل أذنٍ سبايبه
جبته مثل ، واللي جهل ما دريت به=صغته وانا يا بوك للشعر نايبه
والشعر حكمة والحكيم يتدبّره=ما يقبل الا كلمةٍ جات صايبه
واللي فقدها يفقد الطيب معظمه=ماتردعه نفسه ليا شاف عايبه
يابوك وان ماجيت راضي ومحتسب=أمر انكتب فاللوح والنفس طايبه
صابر ومؤمن بالقدر واعمل السبب=يوم الدعا رد القدر في كتايبه
يالله ترزقني بعزام واصلحه=وانفع به امه ثمّ انا ثمْ قرايبه
واحلى ختام الشعر صلوا على النبي=اعداد ما قبّل ولد راس شايبه
وهذه الأخيرة بعد مارزقنيه ربي ( الله يحفظه ويصلحه )
لك الحمد ياربي عدد خلق الاجنّه=وْعدد مامشى طفل وعدد ماصحا أونام
وْعدد برد وامطارالشتا وشدة الكنّه=وْعدد مانبت نبت وعدد طيره الحوام
بعد ما لحق عمري سنوات يطونّه=ثلاثة عقود وفوقها لي ثمان اعوام
وْبعد ما لفى شيب العوارض وعافنّه=على النور في وجهي تزيد العمر باوهام
وْبعد ماسكن داري جواهرلهن حنّه=وْعيوني تناظر تنتظر من لهن قدام
لك الحمد ياربي لك الشكر والمنّه=على مارزقتني بعد هالعمر عزام
فرحت وحظنته والدموع يتغشنّه=وْغشاني فرح مامر مثله طوال العام
تغني طيوره والسعد لي يزفنّه=وكنّي حكمت اغلى ديار الذهب والخام
هلا بك عدد ماسْمك ليا جنّ يطرنّه=خواتك وأمك فالحقيقه وفالأحلام
وْعدد ماتخيلتك ولاحْدن درى عنّه=وْعدد ما ينادوني مدى العمر ابو عزام
والا ياوليدي قدمك النار والجنّه=وانا اوصيك لا ميّزت تبعد عن الآثام
إلهي طلبتك تحْفظه لي على السنّه=وتهديه فعل الخير والبر فالاسلام
وتبعد شرار الخلق من ناسه وجنّه=ولايصحب الامن على المرجله سوام
وتبعد غرابيل الزمن لا يحدنّه=وتجعلْه فبْحور السعد دايما عوام
وخلّه ليا جرّيت انا فالزمن ونّه=سنيد وعضيد وفالمهمات ليّ حْزام
وْحروف القصيدة لو لي اللحن جرّنّه=تهل الدموع وقالت العذر من عزام
انا اعْذرك يا حرفي وعزام انا اظنّه=بعد هالقوافي يعْذرك لا عرفك وقام
وعلى الهادي المختار صلوا على السنّه=عدد ما فرح والد بمولود بعد اعوام
وسلاااااامتكم ودعواتكم
تحيتي للجميع