وأعتبرها أقل فزعه للبناخي مع خواله

السلام عليكم ورحمة الله وبركاته:وبعد
هذه القصيده قلتها في الحفل الذي أقامه الشاعر/ملفي جفين الميزاني تكريماً للشعار في محافظة
عنيزة قبل سنتين تقريباً وأبوتركي يستاهل

من هواجيساً تخيرني بجزلات المعاني=ومن قرايح شرداً يتعب لها راع الجزاله
ومن مواجيباً عليه للجماعة والعواني=وكل ضيفاً من ضيوف الحفل له حقاً لحاله
مرحبا ترحيبةً تثقل على نطق اللساني=ولايخففها عليه ألا حقوق أهل الشكاله
ماتلوق ألا على أهل الطيب طلقين اليماني=الرجال اللي ليا جا الفعل في معنى الرجاله
دام تنظرها العيون ودام تسمعها الأذاني=وبث نايل سات ينقلها على موجة إرساله
مالها أوفق من هذاه الوقت في هذا المكاني=المكان اللي لها والله ما أدور بداله
جامعاً بين الرجال اللي لهم بالطيب شاني=من جنوب وشرق نجد وغرب نجد ومن شماله
في محل(ن)دائماً ضيفه معزز ما يهاني=القريب يدهله واللي من بعيد يعناله
وارد الرسلان تدرج فيه هيل وزعفراني=مع قبال معزب(ن)يكفيك عن زاده قباله
جعل أبوتركي يعان وكل من مثله يعاني=واحداً يشقى بفعل الطيب وبفعل الجماله
يوم أرحب في محله تقل واحد من إخواني=وأعتبرها أقل فزعه للبناخي مع خواله

تقبلوا تحيات الحريص

صح لسانك يالبناخي

صح لسانك اخوي
لاهنت

صح لسانك يا عايض وابو تركي يستاهل الطيب ويحري به.....وقصيدة جزلة من شاعر جزل

صح السانك يابو فارس على القصيدة الجزله وابو تركي يستاهل

صح السانك يابو فارس على هالقصيده الجزله..

صح لسانك واعتلى شانك يابو فارس .ويستاهل ملفي جفين

صح لسانك اخوي عايض وبيض الله وجهك ونعم البناخي ونعم بالخال تقبل مروري

صح لسانك وعتلا شانك يابو فارس وقصيده جزله من شاعراً جزل وقد سمعتها منك في

هذه المناسبه ولازالة عالقه في ذهني واشكرك على تنزيلها في هذا الصرح الشامخ

وابو تركي يستاهل هذه القصيده .

صح لسانك يالبناخي قصيده جزله من شاعر وافي