من عشق ذاتي وعيني من قطعها من وصلها =من عتق بعض العروق وبعظها الاخر رهينه
من تركها في طريق اوهامها تمشي مهلها = وظما قتال والوحشه عمر والوحده لعينه
من نقض وجه الحقيقه بالغلا واللى فتلها =لا بكت عين الغريب وفاضت انفاس المدينه
في دروب (ن)تمتلي حيره وصمت اللي سئلها = نظرت (ن) تسال عن اللي جابت القلب بحنينه
بعد ذاب العرق وسط العرق بالنفس واملها =قلت جاب العشق نفس(ن) مارضت يوم بغبينه
والهوى له لذه بعد العنا نلقا عسلها = لذته من طعمها الارواح برواح سجينه
الوفاء سجان والاقفال صدق اللي قفلها= في بحور مالها غير البشر موج وسفينه
يوم انا الغرقان والمسجون عشق في زعلها = رضي (ن) برضا وليفة خاطري نبضه وعينه
سيدة روح الحياة وجدها البعد وهزلها = هي ثمينه كان راحت وان لفت عندي ثمينه
والعهد من بيننا يقهر نفوس(ن) في عللها = علك الله ياعذول(ن) ماتعرف الا الرطينه
ما سواها لي مشاعر قولها وافق عملها = ما سواها لي سكون وكون وحلام وسكينه
جلها في دقها ياغيمها ولا نخلها = سهلها في صعبها ياموقف اللي محكمينه
ثقلها في عقلها يا جابها واللى عدلها = بوحها في صمتها شيء ولا انتم مدركينه
زينها من طبعها لن شالها ولا نقلها = ما سوا طبع الذهب دام الحيا قفل وخزينه
جمل الله عشق قلب(ن) حبها حتى ثملها = واصبحت مال وبنون وزينة (ن) من فوق زينه