واصرم قلبي صرم عشب المقيضـه = مع شوية الكنـة وحـام الطواليـع
انزاح مرباعـه وشمسـه رميضـه = وغار السموم ارثاع عج المخاويـع
من عقب ماضلت فياضـه رويضـه = ماعاد تشبع بـه فـروخ الجرابيـع
على الـذي يهتاضنـي واستهيضـه = هايـم غـرام مولعـاً فيـه توليـع
ماانساه لو انسى صـلاة الفريضـه = وأنا الذي ماأسمع بحبـه ولا أطيـع
خده سنا برقـاً زمـا فـي وميضـه = برقاً تلالا فـي السحـاب المهانيـع
نـواً علـى سيلـه يعلـم نفيـضـه = يشيل طول اسنايـد الحـزم ويفيـع
وياعود ريحاناً غصونـه غضيضـه = تلاعبـه فـوق السواقـي ذعاذيـع
لاهف حشا مالـه وصوفـاً بغيضـه = أشتاق له شـوق العـذار المفاريـع
وأن كان مالي فالبخوت الحضيضه = ماظنتي عقـب المفـارق مراجيـع
لو من فقـد خـلاً وفـا يستعيضـه = ماسال دمع امـن العيـون المواليـع
واهنيكم يااهـل القلـوب الفضيضـه = ياللي تـردون السوالـف مصاليـع
ماتعرفـون المبهـمـة والنقيـضـه = ولا اسقتكم الفرقا المـراره قراطيـع
ماصابكم حـر المفـارق مضيضـه = وأنا على جمـرة مفـارق وتوديـع
غار الجـروح النازفـه والنضيجـه = اجـاذب الونـات بالصـدر ماأذيـع
اخاف من سود القلـوب المريضـه = كبار الدفـوف مولديـن المضاريـع
أجبر عزاي بدمع عينـي وافيضـه = واواسي الخاطـر بذكـرى وتشفيـع
ذكر رجاي اللي عروضه عريضـه = قـدام لايقبـس فتـيـل المقامـيـع
وراسي رفيـع ولارضيت اتخفيضـه = لـو الليالـي مايجنـي مطـاويـع
وياوقت سافـر بالحمـول البهيضـه = لاتذنـب النفـس البريـه بلاطيـع
ذنبك على النفس البريـه غميضـه = مافيـك لا سـرا ولابـك منافـيـع
مالك على مشهاة الأنفـس رفيضـه = لاتوقـظ الفتنـة بطـق الأصابيـع
خل الهوى يسمع لركبـه نضيضـه = ياخذ على رمل الصحاري مراميـع