منتديات الموازين الرسميه - عرض مشاركة واحدة

غير متواجد حالياً

حرامي السيارات !!

من ذكريات المراهقة التي لا زالت عالقة في الأذهان .. سرقاتي المتكررة لددسن جدي اللي لعنّا كوثرها انا و عيال خالي

طبعا أنا كنت أجودي ودابة مسلمة >>>>> إيه هين !

ولد حليو على نيته ساكن بالرياض ما يعرف هالامور

بس عندي عيال خال مجنن ! هم الرؤوس المدبرة

كان عند جدي ددسن غمارتين بيضاء موديل 92

أحمد في عمري كان هو رأس الحربة قصدي رأس الخطط

وحاتم أصغر مني بسنتين هو الذراع الأيمن لأحمد .! وانا أكمل العصابه إذا جيت لهم في القصيم .!!

طبعا مواقف سرقة الددسن كثيرة وكلها محرجة

لكن الأكثر إثارة هي ما سأرويها الان لكم :

كالعادة في الديرة نجتمع و فاضين أما ع البلايستيشن ولا ع التلفزيون

المهم هاك اليوووم طقت براسي ما أتغدى مع الربع وجعت بعدها

قالوا ما لك إلا تسرق الددسن علشان نروح للبقالة ! طبعا هم الثنائي أحمد وحاتم !

طيب وش السواة ؟ قال العقل المدبر أحمد

خذ هذا المفتاح .. يوم ناظرت إلا وهو مفتاح الددسن !! مفتاح نسخة

أبك انت منين جبته !

طبعا هو ما يعلم بسر المهنة ولا يعلم بأي حاجة يسويها

لدرجة أن المفتاح إلى هذا اليوم ما أدري من وين جابه

المهم انا ما طمعت أبغى البقاااالة وجوعان

الددسن في المظلة والمظلة في المزرعة والمزرعة تبعد عن البيت 200 متر تقريبا

وأنا أقررررط في ثوبي وعلى المظلة

ومن المؤكد أننا لا نهرول عبثا .. لذلك كان لا بد من اتخاذ الاحتياطات

حاتم لازم يراقب جدي إذا طلع يدق علي جوال ! وأحمد بما أنه الزعيم ما يسوي شي بس يراقب الموقف هههههههههههه

المهم وانا أشغل السيارة ويوم طلعتها من المظلة وانتصفت في الطريق

إلا حااتم يتصل علي ! أبك عوّد الرجال عانه طلع

وأنا أشحط الموووتر وأرجع مع دربي

شوي اتصل علي قال تعال الرجال راح بس عجّل لأنه يبى يروح يصلي

وأنا أشحط الموووتر مرة ثانية

ويوم قربت أتعدى البيت اتصل علي قال عوّد عوّد قلت ليش؟ قال جدي سمعته يكلم عمي أنه يبى يروح للمزرعة ويأخذ السيارة

وأنا أشحط الموووتر وأرجع السيارة في محلها

وأجي رجليّــة للبيت مع طريق ثاني حتى ما ينطحني جدي العزيز مع الدرب

الوكاد أني رضيت بالواقع وأكلت لي ما يسد الجوع هاك اليوم أحسن من عيشة البقالة

الكااارثة جات وقت المغرب

كنا جالسين بالحوش في البيت وما درينا إلا الرجال معه عقاله وتنصانا !!

درينا أن الدعوة انكشفت وحنا نقرررط في ثيابنا ونتلقى الخلى

طبعا من خطط الطواري عند الهروب .. كل واحد يهج مع طريق حتى نتوّه اللي يلحقنا

المهم وحنا نعقد اجتماع طاري نبغى نعرف من اللي علم علينا أننا حاولنا نسرق الددسن المنكوبة

طبعا أعضاء الاجتماع حنا الثلاثة بالاضافة إلى زمرة من شباب الديرة

ودايم اجتماعاتنا تكون تحت ماصورة في حيد الديرة

طرحنا القضية وهي من هو الدبووس اللي عـلّـم علينا !؟؟

وتباحثنا منا ومنا ..! وأرسلنا بعض الجواسيس والعيون حتى يستخبروا ما يفيدنا في مسك حبال مدري خيوط الجريمة !! طبعا بما أني دايم أتابع كونان كثير أنا اللي مترأس الاجتماع وأوزعهم حسب قدراتهم الفنية >>>>>>>> روووووح يا قدرات فنية

وفجأة جاء منادي من أقصى الديرة و عرفنا ان معه الخبر اليقين

قال أبشر

قلت ها ياالهدهد وش علمك

قال : اللي دبّــس عليكم عامل المزرعة ( مدار الأفغاني )

!!!!!

إييييه كشفناك يا مدار

المهم هم يشيشوني ويعبون راااسي لين انتفخ هذا كبره !!

قالوا ما لك إلا تضرب ( مــدار ) !

قلت يالربع أخاف ان نحجم عليه ثم عاد جدي من وين له عامل ؟؟ >>>>>>> مصدق يبى يذبحه

وينقز حاتم قال خلنا نسري عليه ونضربه علشان ما عاد يتعودها >>>>> راعين طويلة في سرقة الددسن

طبعا أعمارنا هاك الأيام في حدود 16 أو 17 وأقل

قلت انتم تشوفون كذا .! قالوا سرينا بس

وانا الله يدفع البلى تاصل معي هيضوني و طيروني في العجة

وانا اشتال هاك العصا اللي في أطرافها مسامير وهم كل واحد يشتال له اللي يلقاه أما حديدة ولا خشبة واللي معه حصى .. كلن وما طاحت عليه يده

وحنا نسري لغرفة مدار اللي في المزرعة ! المشكلة مدار فارع الطول .! وعنده بنية جسمانية رهيبة .! كيس الشعير يالله نشيله حنا ثلاثة أشخاص وهو يشيل اثنين فوق ظهره

بس يوم التفت وراي إلا والربع كلهم وراي وانا تزيد عندي المعنويات قلت هذولا لو غزينا فلسطين حررناها !

المهم يوم وصلنا الغرفة إلا العامل المكسين يسوي عشاه يبى ينام

هنا احتدم الموقف واشتد النزع ! تهقون ضربناه ؟ ولا فضخنا راسه ؟ ولا كبينا عليه عشاه ؟؟

قبل ما أكمل لكم السالفة يمكن تسئلون وين أحمد زعيم العصابه واللي يوجهنا !

طبعا أخونا في الله كان مندس جنب غرفة العامل !! ويوم سألناه بعدين ليش تندس يا رخمة !

أثر الرجال كان له نظرة مستقبلية .. عذره يقول انا ما كان ودي أخربها مع مدار علشان بعدين إذا سرقت المووتر ما يعلم علي ! مما يعني أن أحمد راعي طويلة ومشاويره ع الددسن واجد خخخخخخخخ

المهم

يوم وصلت الفرقة بقيادتي

وأانا أدف الباب مثل اللي في الأفلام

واثر المسكين يسوي عشاه ! يبى ينام

وهو يلتفت لي نص التفاتة !؟

قلت : مــــــدار !!

الليله نبى نهجدك هجادن ما قبله ولا بعده

الحين أنت يومنك تعلم علي لاه ؟ أنت تطلبني شي ؟؟

مرة ثانية إذا علمت علي ترى ( قــص رقــبــة ) >>>>>>>>> بفتح الراء والقاف والباء

طبعا هالكلمة قص رقبة إلى اليوم ماسكينها علي الربع !

يوم قلت قص رقبة

وهو يشتال هاك الحديدة السوداء اللي تلمع ونهايتها حااااادة تسنّي أناظر فيها الحين !!!!

وهو يتلفت لي إلتفاتة كاملة ويشد ع العصا

ويوم ناظرت ورا أدور خوياي اللي متعشمن فيهم

وأثر ما منهم احد ما أشوف إلا غبرتهم ورااااااهم

قلت مـــــــــدار !

هالمرة سماااااااااح وماني قايل لك شي مار تعشى وعيّن من الله خير وادحر الشيطان ترى وراي مدرسة وزواج و خطط مستقبلية

بس تكفى مرة ثانية لا تعلم علي

وأنا أقررررررررط في ثوبي و أتلقى الخلاا وألحق خوياي

يوم جيتهم قالوا : قص رقبة ها ههههههههههههه

قلت عز الله ما وراي ظهر مار احلقوا شنبي أن طعتكم مرة ثانية

الحمد لله الحين انا ومــدار اصدقاء عسى الله لا يغيّر علينا

لو هفني بهالحديدة كان ما سولفت عليكم هالسالفة

والسلاااام مسك الختااام .!