الشاعر:عبدالكريم سليم العقيلي

ـاهدا الى الاخ :بندر ابن ضيف الله ابن مدلج

ياعبيــد دن الجيــب مافيــه مكنــون =نبي على الدوشــان ياعبيــد مســــيار
شــيوخنا اللي فاللــوازم يســـــدون =ضـد الحريـب وتكــرم الضيـف والجــار
ربعــن علـى كـل القبــايـل يفـــوزون =وعنـد الرجــال الهم مهـــابه ومقـــدار
يعجبنـي الطيّــب وانــا منـه ممنــون =عاش الدويــش اللي بنى البيــت لمطــار
فيصــل ولد بنــدر به الخيــر مضمـــون =وجـده وابـوه اللي لهم فعــل واذكــار
دوشــان في كســب النواميــس يــرهــون =وفيصــل ولد ســلطان له فعـــل وادوار
وغيره مشـــل اللي عتيبــه يقولــون =ياخــذ على الفرســان ورد ومصــــدار
ونـايف ومن غيــره رجــال يعــــدون =وفيصــل ذرا ربعــه ووطبــان وشـــقار
ولو جيت اباحســب بالعدد كيف يحصــون =دوشــان تاجد فيهم الشــر والخــــار
عســى لهم نــاس على العــز يبقــون =وعند الرجــال الهم مهابــه ومقـــدار
والفغــم له فعــل مــع اللي يعـــدون =اللي على جــو النقيــره خــذا الثــأر
ثــار لهــابس يــوم جــاهم يصيحـــون =وركــض مراكيـــض يشــوقــن الأنظــار
جــزاء العـوازم يوم جوهــم يخمســـون =وذبحــوتا ولا خــلوا على الحــزم ديــار
وانـا من اخبــار العــرب ما معي لــون =غيــري ريــاجيـل يجيبــون الأخبـــار
والشــيخ ابن جبــرين مقــدم ذوي عـــون =زيــزوم عبــدالله ليــا شـــبت النـــار
ومتعـب مضى لـه فعـل والنــاس يــدرون =وابن بصيّــص مشــبع الذيــب والطــار
ليـا جــاء نهـار فيه طــاعن ومطعــون =مطــار حمــران النواظــر لهم كــــار
صعيــب والصعــران وعيـــال ميمـــون =وواصــل مســقيت العــداء مر الأمــرار
وبريــه شــجعان على المــوت يـردون =وعلوى هل الطــاله على ســـرد المهــار
وصــاهود ابن لامي على ما يقــولــون =يمشـي بجبـلان يدوســـون الأخطــار
واهل الركيـــب العشــر لازم يعــدون =ومدبــاج اله فعلن تكــارير وامــرار
وغيـره هل الجدعا عســـاهم يعيشـــون =حمــو ركــايبهم بعد صــاير صـــار
وابن قطيــم وبه ســقاييــن وضمــون =وابن شــرار وربعتــه شــر الأشــرار
وشــلاح تفعـل والهويمــلات يثنـــون =اليــا رقص شــيطانهم والملــح ثــار
ليـا جاء نهار فيه صــاحي ومجنــون =تلقــى ديــاحين على الخيــل كفــــار
والمنــدهه يوم القبـــايل يصولــون =يمشــي بربعه فــوق حـــزبات الأكــوار
وعبــاد ابن شـــلاح للحــق قـــانون =وربعـه ليا جـاء الكــون للمــوت زوار
ســمو بني عبــاد للحــرب يضحــــون =يشــهد نهار القــرن يمين وايســــار
وابن بنــش فعلــه به النــاس يــدرون =ليا شــانت الأيـــام ردو لــه الشــار
وربعي عقــاليتِ على وقــت هــارون =رجــالهم مثل البليهي ليا ثــار
وعــدوانهم من ريبـهم ما ينــامون =وافعولهم يشــهد لها نــاس حضـــار
قالــه عقيلين خــواله ذوي عــــون =حــامد وزبن اللي لهم فعل واذكــار
وربعي من الحــره اليا السيف يرســون =باعلى على وضــح النقا ســر واجهــار
وشـيوخنا الدوشــان ربعن يســمون =ضـد الحـريب وتكــرم الضيف والجــار
صــولاتهم عنها القبــايل يجــولــون =من من خــاف منهم بدل الدار بديــار
يـوم العلـوم اعلــوم ما يســتذلون =تمشــي ركــايبهم الى الشــط عبــار
يمضــي لهم وقت على الوجــه يمشــون =وتلقــى لهم في ديــرة الخوف ســبار
واليــوم ناموا والمعــازيب يكفــون =بذرى هل العوجــا طــويلين الأشــبار
والمملكــه بيـــت محصــــن ومصيــون =حــامينــه ال ســعود من كــل غــدار
غصــب عن الحســاد وابليــس ملعـــون =في الأرض دبــابه وبالجــو طيــــار

مشكور يابو عمر على الاهداء ..والهدية مقبولة

وصح لسان ابو عوض ..الشاعر الكبير عبدالكريم العقيلي..


ولاننسى ان ننوه هنا اننا قد قمنا بعمل لقاء مع شاعرنا الكبير اطال الله في عمره سيرى النور قريبا علي صفحات المنتدي..

والله يبقيه لكم ويمتعكم به



مايهاب

صح لساااااااااااااااااااااااااااااان الشاعر
واهداء رائع ويستاهلون

صح لسان الشاعر الكبير عبدالكريم العقيلي وقصيدة تعتبر ملحمة شعرية رائعة ومرجع للكثير في تأريخ مطير

وقد تم تنسيق القصيدة , وننتظر اللقاء يا أبو عمر

صح السان الشاعر ويستاهل الممدوح

صح لسان شاعرها