يانجد_ قصيده لهليل هويل الميزاني

يانجد مايخطيك نو الرشاريش = وجعل السحاب الغر دايم يرشه
يحي الديار الممحلات المعاطيش = ويبري همومن وسط قلبي تحشه
من شان لامنا بغينا المطاريش= الهم والهاجوس عنا نطشه
لون ماباقى ياتركي عراميش= لكن سِج الرجل والوقت مشه
والله لونشرب زلال النقاريش= ماينفع الملهوف غده وعشه
عان الحرار امست مسجن بلاريش= والبوم ولد البوم يامر بعشه
هذا زمان مصلحين المناقيش= متساون سمْره وعره وقشه
واضحك على اهل النمنمه والدنابيش= اللي رداهها ثابتن لو تمشه
واتعب مع اللي يكرمون الهتاتيش= وادعس على اللي كل من جا يوشه
ينقب البترول حمر الطرابيش= مانقبه من ينقل الكبر جشه
مير البخيت يطنش الناس تطنيش= ماكل شيٍ لاطراله يدشه

صح لسان الشاعر الكبير هليل بن هويل القحم وابو تركي شاعر جزل غني عن التعريف

واشكرك يالقناص واطلب منك المزيد من قصائد ابو تركي

قصيدة روعه وقافيتها موسيقاها عاليه وجميله جداً وفي نفس الوقت صعبة إلا على المتمكنين ...

صح لسان الشاعر هليل والف شكر لنقلها لنا ولا تنسانا من إنتاج الشاعر

مير البخيت يطنش الناس تطنيـش=ماكـل شـيٍ لاطـرالـه يـدشـه

وانا أشهد..

أبن مصاول

الله يعطيكم العافيه والصحه على مروركم الأكثر الجميـل ...
وانشـاء الله المزيد في الطريق..

صح لسان الشاعر وقصيده جزله
والشعر اللي مثل هذا الشعر يعجبني ماهو الشعر الجديد اللي راعيه يوم يلقي قصيدته يدينه مثل المراوح وقصيدته اهم شي يجيبها على القافيه لون معانيها عاديه وبعض قصايدهم مالها معنى اهم شي يطلع ويقول انه قال قصيده

صح لسان الشاعر المبدع ابو تركي والله يعطيك العافية اخوي القناص

صح لسان الشاعر هليل والف شكر لنقلها

ابو تركي معروف ورجال من الر جال الطحا طيح وشاعر جزل وصح لسانه
ولاهنت يا لقناص الميزاني