مجاراه بين الشاعر جري الهنشل والشاعر مضحي السلمي

مـــجــــاراه بــــيـــن الــــشـــاعــــر / مــــضــــحــــي بــن نــــامــــي الـــســـلـــمــي
والــــشــــاعـــر الـــكـــبـــيــــــــــــر / جــــري بــن عــبــدالـــرحـــمـن الــهنــشــــل

قـــال / مــضــحـــي...

يامرسلي ابدأ بطّه والاحقاف = واكتب وانا ابمليك من لا كلافه
خل الحروف بصهوة الطرس تنشاف = خِف اليراع ولاتزود رعافه
واحذر يجي في شطر بيته تعجراف = من خوف لايقراء خطا بانحرافه
الشعر له معنى ومغنى وميقاف = ومن لاجمعها كلها شان قافه
وانا حريص اجمع بها كل الاوصاف = مابي يقال ان القوافي خُرافه
قافٍ بلا معنى ولاسبك ينعاف = وزادٍ بلا ملحٍ كثيرٍ عيافه
اقولها للي له الطيب مشراف = من عادته طيبه لشخصه وصافه
(جري) جري ماله جري في هوى القاف = بينه وبين القاف عشق وولافه
اسوق له قافٍ له القلب ميلاف = شعرٍ نظيف وفيه بعض الشفافه
وانشده عن مزنٍ كسى روس الاطناف = وبله حقاق وماه ماله مسافه
مابين وبله والثرى صاير خلاف = ومابين ليله والنهار اختلافه
ماقل دل وكل جابه لها اهداف = والحر حر ومن نوى الصيد حافه

قــــال / جـــــري

يامرسلي عجل عليه بالاسعاف = انقذ غريقٍ طاح له في فم آفه
انا الغريق من الغرق صرت خواف = حتى البحر ماعاد نقرب ضفافه
ويامرسلي بالهرج لاتصير مزهاف = خلك ثقيل ولاتحب اللقافه
قُدمك صليب الراى فاهم وعراف = اكتب له المكتوب واوثق غلافه
قله وصل مرسولكم عُقب الاصلاف = وارتاح من بعد التعب والكسافه
قِدم له الماجوب من كل الاطراف = وادىَ الامانه واهتنا بالضيافه
يامرحبا عداد من زار واطاف = وعداد نوٍ نازلٍ من طخافه
برسالةٍ جتني على قد الاوهاف = من غيرها للشعر مالي حسافه
من شاعرٍ بيطار للشعر صراف = يصرف ذهب ماتَعَبَته الصرافه
مصيونةٍ مازونةٍ كلها أرداف = لاشافها الشاعر تزايد شعافه
يا(مضحي)اودعت المعاليق تنلاف = وكلفتني في موج بحرك كلافه
غديت بين الميم والنون والكاف = ماكني الا ماسكٍ لي صحافه
من عادة الشاعر مولع ومهياف = ويازينها لاصار معها ثقافه
ينشد وانا باللغز فاهم وهداف = وكلٍ على جسمه يفصل لحافه
الخير واجد مير عينت الانصاف = عيوا عليه قليلين الريافه
من لاعرف ممشاه حطوله كتاف = لاحدٍ سمع صوته ولاشخص شافه
اخذ الحذر من خوف غادر وحواف = واتبع خضار العُود واترك جفافه

صح لسان الشاعرين / مضحي السلمي و/ جري الهنشل
قصايد جزله .. وابيات مايجيبها الا شعار كبار
ومشكور يافجر الجروح على ايرادها .. وننتظر المزيد

توضيح .. هذه مجاراة وليست محاوره

إشكرك على النقل أخوي فجر الجروح

اشكر على هذا الايراد وصح لسان الشاعرين الكبار : مضحي السلمي وابو جعفر جري الهنشل..