الزهر الاحمر ل( محمد عامر بن نيف ) جديده

السلام عليكم ورحمة الله وبركاته

مبارك عليكم الشهر وتقبل الله طاعتكم

بعد طول الغياب حبيت اقدم ما يرضي ذائقتكم الشعريه

واتمنى تنال إعجابكم

رميت أطراف جسمي فالبسيطة من تعب وإنهاك=وغبن ٍ مشتعل فالقلب مثل النار مشتبه
بعد كسّرت كوري للطريدة من ثقة وإدراك=حسبت إنه قدر محتوم وآنا للقدر سبّه
رجعت مرصع ٍ خفّي من المقناص بالأشواك=عقب علقّت قلبي في رجاء خشف ٍتلاعبه
لعبّه جيد ريمي ٍ تدرّق في غصون الراك=وأحاسيسه على رزّة طويل العنق منصبه
لمحته والتمع مرتاب واعرض في وجل وارباك=تذيّر عقب هب الريح واستوحش من الهبه
رمى عود الأراك وطاح من هاك اللما المسواك=منه يجن النحل شهدٍ من المبسم تشربه
علامك ياخشيف الريم طوّحت الخطى منّاك=تضرّبني سراب ٍ قام يطرق كنه الغبه
تتبّعتك من اشريق الضحى لين الظلام أمساك=وقلت بخاطري كبّه عقب حل المساء كبّه
يعزّيني فراش الروض لارفرف على وجناك=يرود بوجنتك ورد ٍ حمر وجهك تنقبه
وعزايه في شعاع البدر لامسّا على ممساك=ونور ٍ رد بالترحيب من غرتك واللبه
وعزايه في عبير الروض لا سلم على محياك=وثغر ٍ بعثر الريحان بأنفاسك ورحبه
وعزايه فالنسيم اللي سرى يمي على مسراك=يفل من الجديل أربع خصال ٍ شقر تلعبه
الأولى من على الغرّه يمشطها هدب نجلاك=والأخرى من على خدتك فوق الصدر منكبه
وباقيهن يحف الجيد من يمناك لا يسراك=هلاليل ٍ ورى الكتفين كالشلال منصبه
وعزايه في نجوم الليل يوم تشع بين اشفاك=على غر ٍ كما اللولو تناظم حبة ٍ حبه
اليا منّك بلجت ابهن تلاعج ضيّهن في فاك=كما المطرق مع الساحر على البلور يضربه
انا وش جابني لك غير طرفك ذاك .. مدري ذاك=احبه قبل ما احبه .. واحبه عقب ما احبه
لا عل الكاهن اللي بالطلاسم ينفث الشرباك=يفك الله عيونك من عقابه ما تعاقبه
اخاف إنه بعث جنّه تشف السحر من عيناك=واخذ منهن رموز الطلسم اللي قام يكتبه
انا وش جرني للصيد لولا سحرك الفتاك=اسر قلبي طوال اليوم شرق به وغربه
عوافي يا خشيف الريم سبحان اللذي نجّاك=عقب يوم لقفتك فيه غافل ما انت متنبه
رميتك ثم تبعت خطاك .. احسب إن السهم ما اخطاك=حسبت إنك صويب وفيك جرح ٍ ضايع ٍ طبه
رميت إمكسر الكور وزهابي واقتفيت اخطاك=اجنّب كل حزم اتجنّبه وآذب ما تذبه
إلا منّك عديت احط ماطايه على ماطاك=والا منّك وثبت آمد شوقي واتوثبه
اقول شوي يطرحك الصواب هناك والا هناك=وهذا انته تجر اخطاي من خبه على خبه
وانا اللي ما رميتك لين قاديت اربع لمرماك=نظر عيني على مقتلك والنيشان والحبه
عجب كل العجب .. كيف السهم صابك ولا دمّاك=هو أنت اللي رميت أو هو خيال ٍ فيك متشبه
اشوف الزهر الاحمر واحسب انه من حمار إدماك=حسبت إن الزهور اليا نطف دمك تخضبه
خطا والا صواب !! الشمس غابت كيف عاد القاك=ومع ذا .. عقب حل الليل صيد الليل ما احبه
أبا اعوّد لتالي مزهبي واسرج ظلام احماك=ابا اجمع كوري المكسور .. واقدح فيه واشبه

محمد عامر بن نيف

روعه , شئ خيال يا بن نيف , دائماً مبدع ودائماً لا يشق لك غبار .

نعم نحن الآن نقف امام الشعر , أمام هامة من هامات شعراء مطير , طوبى لمطير بشاعر مثلك.

يالله لقد أبحرت مع هذه القصيدة التي تتلألأ كانها نجوم في ظلام ليلٍ دامس .

نقلتنا بها الى حيث الشعر ...الى حيث الشعر نعم هذا هو الشعر وهنا يتوقف الشعر وهنا نستمتع بالقصيدة التي تسمى قصيدة مترابطة في معانيها في قوافيها في صورها وقد جأت قفلتها رائعة بروعة محمد بن نيف ..

لله درك من شاعر مبدع ,,,لله درك

ونشكر اخونا الطود على نقله لمثل هذه الفرايد الى منتدياتنا مع اننا لنا عتب عليه في إقلاله ولكن أيضاً نعذره لأن مثل هذه التحفة الشعرية لا تتكرر

أبن مصاول

بيض الله وجهك يالطود على النقل المميز

اسعدني مرورك اخوي ابن مصاول