قصيده لبو متعب (محمد سند)

بسم الله الرحمن الرحيم

السلام عليكم ورحمة الله وبركاته


قصيدة الشاعر / محمد سند مصاول المطيري


وهي واضحه تعبر عن نفسها

ياراكب اللي كاملاتن نقوده = أخر موديل وبتواصيف فكس آر
جيبً مجهز ولمصفى وقوده = لولا الفرامل كان من سرعته طار
اليا تحرك ثم دارن عضوده = تقول صاروخً يوجه بالاقمار
أجمل من اللي زامياتن نهوده = واحسن من اللي وقفوهن للنظار
فيها المكيف مركزي من وروده = ليا طق زره برد ألاهب الحار
واللي يسوقه عاقلً به ركوده = قرمً على قطع المسافات صبار
طيب وطيبه وارثه من جدوده = حكيم راي ولا يعلم بالاسرار
والمرجله ماهي عليه محدوده = لكن عنده يانشاما لها كار
ينقد على اللي ينثني في قعوده = ويزرى على اللي ينقل الحكي ثرثار
اليا نوى درب السفر مايكوده = ومعه ولد عمه سنافي وصقار
يمشي مع الاشراق وقت البروده = قبل طلوع الشمس في وقت الاسفار
يبون صيدن رابين في نفوده = يرعى زهور العشب من عقب الامطار
بأرضن مربع والذواري تذوده = في ديرتن قفراً بعيدن عن القار
في ماقعن واهل الدبش ماتروده = جون خلا في القيض ماحوله انهار
اليا تهيا لازمه مع وجوده = تقول يملك له ملايين دولار
يازين مشيه يوم يفتل عموده = مع خايعن نبته زبيدي ونوار
وعقب السفر يرجع لناقش خدوده = غرون نهوده لونها بيض وصغار
يفرح ليا شافه ويمشط جعوده = اليا تبسم يدهش الفكر بسكار
ترف ً جمال وغاشن الزين عوده = ماهي من اللي لونهن خضر وكبار
هذا الهوى والرزق ربي يقوده = والطيب ماتوخذ حباله بالاشبار

وسلااااامتكم


أخوكم / سند محمد الميزاني

أخوي سند دائماً تتحفنا بقصيدة رائعة تلو الأخرى للشاعر محمد بن سند بن مصاول شاعر غني عن التعريف ومن بيت شعر عريق ...قصيدة غاية في الجمال والوصف الجميل خاصة للــVXR

وأبو متعب معروف عنه تولعه بالصيد والرحلات التي يقوم بها فترياً ولم يلهه عنها إلا الذود الذي قام بقتنائه واخذ منه جل وقته ...

صح لسان الشاعر الكبير أبو متعب ولا هنت اخوي سند على إنقلها لنا

أخوك أبن مصاول

صح لسانك قصيده جزله

لاهنت وتقبل مروري

صح لسان الشاعر أبو متعب ولا هنت اخوي سند على إنقلها لنا