سعود القت وقصيدته (ذباحة الشيوخ)

اطلق الشاعر سعود القت لقب (ذباحة الشيوخ) على قبيلة (بني عبدالله) من مطير .
وذلك في قصيدة تعتبر ملحمة ونادره حيث ألقى قصيدته الشهيره في ملتقى بني عبدالله الذي تم موخرا في هجرة خريمان وخص قبيلة بني عبدالله بهذه القصيدة الشامله والشامخه كشموخ صاحبها :


( ذباحة الشيوخ )

لاهاج فكري واصتفق موجه مثل موج البحر = يطغى على كل البحور وترتبك بحسابها
حتى ينومسني مع أهل الطيب ممدين النظر = يدخل مداخيل الثقه وينال كل إعجابها
نعم زما بالمرجله ويهيل لامنه كسر = يرعب مصففة الحروف وتكتفي بغيابها
حضرت في حفل العبادل ربعي الموت الحمر = اللي ليا من ثارت الهيجا تمس أشنابها
ربعي هل الهدلا مطوعة الاعادي بالجبر = يوم العصور المعسرات اللي تحد أنيابها
ربعي معطرة النمش لاجات حزات العسر = مشيبه روس المعارك لا قبس مشهابها
ربعي مقابيس الوغى لا راحت الدنيا جمر = وارتج وجه الارض والفتنه شهر مشعابها
ربعي سهوم الموت مدهال الهقاوي والضفر = قبيلةٍ كل القبايل فالحروب تهابها
مجتمعةٍ فيها الشجاعة والحميه والسطر = مثل السيوف اللي تهاب القوم من مضرابها
دقلاتنا ترعب سلاطين الشجاعة والدجر = قبيلةٍ تسكر ضفر لوحت حداء حرابها
لا ثارت الهيجا نشوش إلها ونعطيها النحر = والنار من شبابها والخيل من ركابها
نسكر على ريح الفشق لا ثار والجو استعر = وهبت سموم الموت والاعداء لفح ملهابها
ننطح مقاديم الاعادي بالمهند والخطر = ونردع مقاليط الخصوم بحربةٍ تكوابها
ليا انتختنا الراعبيه نشبع الدنيا قشر = تبشر بنا بنت النشاما !! لارمت جلبابها
حنا بني عباد راس الموت راهين الشبر = شجاعةٍ في روس صارت مثل يدعابها
كم شيخ قومٍ من شجاعتنا تحت ضرس القدر = الشوخ نفنيها وباق القوم زاد إرعابها
هدرت جملنا تنسي النوماس مقلاط البشر = سجّلنا التاريخ صفحة واتعبت كتابها
حنا (مذبحة الشيوخ) اللي بها زوم وكبر = وحنا مشيبت المعارك لا سمك ضبضابها
يكسر بنا العظم الصليب ونجبر كسور الدهر = وحنا طواغيت الشجاعة لندقم مخلابها
في قمة أمجاد الجزيره واكرين أعلى وكر = والمرجله قدامنا محدٍ يسكّر بابها
متسلسلينٍ من هل الطالات (حمران النظر) = أهل الثلاث المعجزات اللي تنومسنابها
وديارنا من مفرع الحره ليا سيف البحر = شيٍ يهول العقل لكن الولي وهابها
من دون قاصر فالقبايل كل عسرٍ له يسر = ومطير ربعي والمدايح في مطير أحيابها
وختامها من عبدليٍ يطّبخ راسه ضفر = ولا يطرب الا لا مدح ربعه وعد أنسابها

سعود رشيد القت القميشي الشلاحي العبدلي المطيري


منقول


وصح لسان الشاعر سعود القت وقد أشير للملتقى تحت هذا الرابطhttp://www.almouazeen.com/showthread.php?t=13008

مشكووررأخوي ابو ضيف الله ع النقل

صح منقولك يابن مصاول

وصح لسان ابوعمر سعود القت وله بالشعر مواقف في محلها

وتقبل تحياتي وتقديري

اسم على مسمى ويستاهل ابو عمر كل خير شاعر اخذ حقه بالجزيل ولايهونون الشعار

كم شيخ قومٍ من شجاعتنا تحت ضرس القدر
الشوخ نفنيها وبـاق القـوم زاد إرعابهـا
هدرت جملنا تنسي النوماس مقلاط البشـر
سجّلنا التاريـخ صفحـة واتعبـت كتابهـا
حنا (مذبحة الشيوخ) اللي بهـا زوم وكبـر
وحنا مشيبت المعارك لا سمـك ضبضابهـا

الأخوان الأعزاء ماهر المطيري,طقها ولحقها و الأخ أبوفيحان أشكر لكم مروركم وتعليقكم وصحت أبدانكم والشاعر سعود القت من الشعراء المبدعين في زمن كثرا فيه الغث وهزيل الشعر ..لله دره وصح لسانه

قصيدة قمة في الروعة ...وكلها جزالة ومعنى ..لا فض فوك ياالشاعر..وسلمت يا ابن مصاول على النقل..

صح لسان الشاعر سعود القت

‏ ‏ ... لاهاج فكري واصتفق
‏ ‏ موجه
مثل موج البحر...........

تقبل مروري