شوق الملوح لطرو العامريه

(شوق الملوح لطرو العامريه)

البارحه رجم العنا بادي فيه = بعد صلاة العصر والشمس حيه
رجم خلا ماشفت نزل حواليه = مافيه كود الذيب والراعبيه
رجم يتعب رجل من كان راقيه = ويكشف علوه لك حزوم مديه
وقفت أمد الشوف من فوق عاليه = وآخذ مع الافكار روحه وجيه
وجلست أبيع الهم وآعود أشريه = مابين ذيك وبين هاذي وذيه
أثر الرجوم اتذكر القلب ماضيه = واتعيد ذكرى إسنينه الأوليه
جيته وباح القلب ماكان مخفيه = لاعاد مرقن فيه هاك العشيه
ذكرني بدار لي سنين ناسيه = دارن لهافي خاطري مقدريه
عسا الخيال اللي زبرمن مناشيه = يسوقه المعبود وآل البريه
يجي من القبله هبوبه تقديه = حتى يجي بفروع نجد العذيه
ولآجا علاوي نجد يمطر ويسقيه = من المضيح لاشمالي طميه
وساحوق والبهره وماوان يرويه = وعلى العجام وعبلتك يالجويه
من شان عقب الوقت تنبت مراعيه = لوكان أنا ماني براعي رعيه
أبي ليا جينا ودجنا براضيه = نشوف كل أرضه زهور نديه
والروض ربله والخزاماء يغطيه = وفيه أم سالم تلعب السامريه
ونشوف فيه الذود مبسوط راعيه = مستانس عقب السنين الشقيه
أحب ذاك الدار بالحيل وأغليه = محبته وسط الحشا داخليه
يشتاق له قلبي لياجيب طاريه = شوق الملوح لطرو العامريه
وممشاي بحزومه وشوفة صحاريه = عندي ترى تازن قصور العليه

( شاعر الغربه)

شبل عصيم الميزاني

يجي من القبله هبوب تقديه
حتى يجي بفروع نجد العذيه

الله الله هيضتنا بهالقصيده الجميله جدا اخوي شبل عصيم والله انك صادق هاكالديار الياربعت بعد الامطار لها جو اخر ذكرت بعضها ماقصرت انت شاعر جزل وتتميز قصائدك بأصالتها اللتي تجذب
المتلقي لك تقديري اخي العزيز

السلام عليكم ورحمة الله وبركاته وبعد /
قصيدة رائعة تحمل أسماء عدد من الأماكن التي تشتاق النفس لمرآها أجدت فن التصوير في أبياتها لدرجة أن قارئها


يعايش واقعها التليد .

والله العظيم مبدع يا شبل عصيم !!

ودمتم سالمين .

أخي أبوبندر مرورك واشادتك وسام على صدري لك كل الوفا والاحترام

أخوي الملهب كلامك تاج على راسي وشهادة أعتزبها لك مني وافر الشكر

شكرا للجميع

صح لساانك اخوي شبل عصيم

صح بدنك أختي العنود كل الشكر على مرورك المميز

صح لسانك على القصيده

صح لسانك يا شاعر الغربه