رحلة حزن

*** رحلة حزن ***

البارحه فأحلى منامي تحلمت = حلمن جمعني مع عنود المزايين
جتني تكلمني وانا ماتكلمت = تقول وينك غايب عني سنين
وابطت تعاتبني وأنا لازم الصمت = وتقولي وين الوفاء والعهد وين
تقول تذكريوم تقسم وانا أقسمت = مانفترق مادامنا ثنين حيين
وبكت بحزن ومن بكاها تألمت = وشفت الدموع تفيض من محجر العين
ومن شدة إبكاها على صوتها قمت = وذكرت من فارقتها قبل عامين
وفي غربتي عنها وبعدي تندمت = وآحس قلبي تنغرس فيه سكين
وعلى الرحيل لديرة الزين عزمت = لو المسافه ألف واللا ملايين
وشغلت انا الموتر وللعفش لملمت = وقررت اواصل رحلة البعد والبين
وساعة وصلت من السفر مابعد نمت = لقيت اقاربها سوات المساجين
واسواء خبر عنها به إهناك علمت = قالو توفت (ناديه)من سبوعين
وانهارت اعصابي وطحت وتحطمت = ودخلت مستشفى ونومت يومين
وصحيت للدكتور جالس وسلمت = قال الغرام وعاشقينه مساكين
قلت انت يادكتور وش بك علي لمت = قال النتايج فالإشاعه لك إتبين
طالعتها جيت آتكلم وتمتمت = وشفت إسمها مكتوب من بين قوسين
ودخلت دار الحزن واهناك خيمت = ومن بعدها وانا بحزني لهالحين
رحلة حزن وهموم معهاتصادمت = والجرح الاول زاده اليوم جرحين

شاعر الغربه
شبل عصيم الميزاني

صح لسانك على القصيده

صح بدنك اخوي ابوغازي

صح لسانك يابو عصيم
قصيده مؤثره ومشاعر حزينه في رحله فكريه كلها شجن
لاهنت على هالابداع المتميز
.

صح بدنك أبن الشاعر ولاعليك زود

صح لسااااانك يابو عصيم

قصيدة جزلة من شاعر عرف بالجزالة

تقبل مروري مع جل الإحترام

صح اللسااااااااااااتك يشاعر الغربة .

صح لساانك اخوي شبل عصيم

صح لسانك ياشبل عصيم لونك حزنتنا به القصيده الرائعه

حياك الله أخوي منصور تشرفت بمرورك