*~ حواء في حوار هادئ مع نـــــ المشاعر ــــزف *~

عودة أخـــرى للموضوع ...
والله يستر من توالي هالعودة (:






~ المرحلة الثالثة ~





س1/هل انتي مع أو ضد لبس العباية؟
معها بالتأكيد وأعتز بها الحمدلله ..



س2/كم عباية تملكين ؟ وما انواعها ؟ بصراااحة
هاه !!! << فيس وده يصرّف بس محشور هههههههه

الجد اني املك خمس ..
ثلاث رأس
وحده للدوام
و أخرى للكرف سوق و ما سوق ..
والثالثة للعزايم و خلافه ..
وثنتين كتف
وحده للبر والمكاشيت ..
والثانية حقت زواجات " شك و قراشيع " بس والله مالبستها بأي زواج للحين ):





س3/ما رأيك بالبنات اللي يقولون " لو أهلنا أو الدولة يسمحون لناكان ما لبسنا العباية"؟

أقولهم اللي تلبس عباية بدون إستشعار لقيمتها الحقيقية
ماعليها حسوفة لو رمت عبايتها ..
لأنها بتكون بالعباية وإلا بدونها واحد ..
فالجوهر هو المحك ..



س4/متى أول مرهـ لبستي فيهآ عبايهـ؟ وهل كنتِ مجبرهـ؟ وإلابرضاكـِ؟



يازينك وزين علومك يانزووف تجيبينها على الجرح دايم

هذا يا طويلة العمر لاني أنا اللي أبلشت أهلي إبلاش لين شروا لي عباة وأنا في الإجازة الصيفيه بين سادس وأول متوسط ..
ولها سالفة وهي إن
أبوي كان يقنعني أطلع معهم لحديقة قريبة من بيتنا كان متعود بعض
الليالي يأخذنا ويلّعبنا فيها شوي ..
وأنا مدري ليه .. حاسه اني خلاص كبرت وما عاد أحب أحد يشوفني ..
فرفضت أروح .. ومسكت معي إلا يشترون لي عباة ..
امي تهاوش .. وإخواني يتطلبوني أروح عشان مايهوّن أبوي ..
وأنا عجزت أفهمهم بوجهة نظري ..

_ يابنت الحلال إمشي ..!
<< ما أروح إلا بعباة
_ يابنت الحلال بنشري لك بس بعدين ..!
<< أبد .. عباة يعني عباة ):

ومنا ومناك ليين رضو يتركوني بالبيت عند أمي وهم يروحون يتمشون ..
وبعدها بفترة شروا لي عباة ..
وكنت أضحوكة الموسم بالعائلة أنا وعباتي

المشكله اني كنت متوقعه الأمر سهل ..
أثر العباة تبي غطا وتبي ركادة وأمور كثيرة مافكرت فيها إلا يوم بديت أعاني وحسيت إني وهقت عمري بشي ممديتن عليه ..



س5/كم تفضلين عمر البنت عشان تلبسها؟


والله يالغلا كل بنت لها ظروفها وظروف أهلها اللي تختلف بها عن غيرها ..
لكن أنا شخصياً لو كان عندي بنت بأغطيها أول ماتخلص سادس ..
حكاية انها تتأخر بلبس العباية كثير ماهي حلوة ..
أحس فيها خوف عليها .. وأنا خوافه كثير ..




س6/ما رأيك بعبايات اليوم.. الفراشهـ .. الوطواط... الخفاش وما ادري أيش بعد ... الخ؟ هل تعتقدين أن هذه الانواع منالعبايات ساترة ؟

والله يالغلا الغرض الأول من العباية " الستر "
والله عز وجل لما أمر المؤمنات بالحجاب والستر لم يحدد مايجب عليهن إتخاذه لباساً للستر ...
أخبرهن فقط بأن ( يُدنين عليهن من "جلابيبهن ")
وفي آيه أخرى ( وليضربن بخمرهن على جيوبهن )
صدق عز من قائل ..

وبعض عبايات الكتف واسعه وساترة ..
مثل الفراشة أو البشت ..
هذي أعتقد ان مابها شي وبالعكس ساتره وضافية
بشرط ما تكون مزركشة ..ولا تُتخذ للزينة ..
وعلى النقيض فيه عبايات رأس لكن تأتي أحياناً مخصرة وتعطيك تصور كامل عن تفاصيل الجسم من وراها !!
وهنا مانقدر نقول إن عباية الرأس بكل الأحوال أفضل من أختها عباية الكتف ..
بالعكس بهالحالة الكتف هي الأستر ..
خاصة انه يكون فوقها طبعاً " طرحه " لا تحدد تفاصيل الجسم ..

لكن تبقى الكتف إجتماعياً لاتحظى بإحترام مثل عباية الكتف ..




س7/ إذاخرجتي من المنزل هل تلتزمين بالحجاب الشرعي ( العباية الواسعة ومغطية العيون ولابسة شراب وقفاز )
ولا لا ؟ بصراااحة ( طبعا طلعة عن طلعة تفرق )

اكيد طلعة عن طلعة تفرق يالغلا كما ذكرتي ..
لكن ولوو ألتزم بحجابي الشرعي عباتي ونقابي وغطاي
لكن قفاز لا والله ماعمري لبسته ..
والشراب برضو ما ألبسة والله .. إلا إذا لبست " كوتش " أكرمكم الله ..




س8/نصيحة توجهيها لحواء المتبرجة ؟

ترى الآخرة تبي بعد يالغالية ..

المشاركة الأصلية كتبت بواسطة نزف المشاعر

عباة نوح ياعنوني عندنا بالدمام يقصدون بها : عباية الراس الواسعه اللي قماشها يلمع ويبرق *_*


أهآآآآآ .. أشوفها على الحريم صايرات كانهن حوت توه طالع من البحر ويتلامع على الشمس ..


بس وش دخل نوح بالموضوع ؟؟

^_^
آووووما حوت ههههههههه
يسمونها عباة نوح تعبير عن كونها قديمه مره
بس رجعت كموضه جديده *_*

مستمتعين ياالمطنوخة وبأنتظار المراحل التالية...وتسلمين على الأجابات الرائعة.

المشاركة الأصلية كتبت بواسطة آحلى عسلـ

^_^
آووووما حوت ههههههههه
يسمونها عباة نوح تعبير عن كونها قديمه مره
بس رجعت كموضه جديده *_*

فهمت عليك عسولة .. هذي عادي مافيها شي وأعتقد إنا كنا نلبسها قبل تجي الأقمشة الجديدة .

اللي عندنا يلبسون عباية تلمع بزيادة نوعية قماشها غريبة وأكمامها ضيقة تقريبا هالعباية طايحين فيها لهم حوالي سنتين .

ياربي .. ياحليلك ياشلاحة أنتي وإجاباتك مرة روعة وصريحة أهنيك على صراحتك . يابعد حيي إنتي .

بانتظار آخر مرحلتين ~

ضيفتنا القادمة أوتار الحنين

أهلا وسهلا بها معنا ~

المرحلة الرابعة "


س1/ وجبتك المفضلة؟
أعشق الصواني بشكل عام .. سواء صواني مكرونه أودجاج , أو خضار ,
برضو الكبسة السعودية لا يُعلى عليهاااا , الله يديم النعمة ويبارك فيها ..


س2/ حادث صار لك بالمطبخ لا سمح الله ؟

حادث شنيع ماحصل ولله الحمد ..
لكن الحوادث البسيطة يا كثرها ..
ماعمري دخلت للمطبخ متحمسة إلا أطلع بـ كوية وإلا كويتين بإيدي (:

س3/طبق تحبين تسوينه كثير؟
صينية مكرونه ودجاج .. والحلو بالموضوع إني كل مره أسويها بشكل غير << تحب تخترع (:


س4/متى تعلمتي الطبخ ؟
نزوووف بأقولك سر أنا أمي كارفتني من يوم اني برابع إبتدائي ..
طبعاً تحتاجني لأني أكبر خواتي .. وماعندها غيري ..
وأول طبق عرفت اسويه كان " رز أبو لبن " <<< لاتعبتي (:


س5/ موقف طريف صار معاك في المطبخ؟
امم والله ناسية .. لكن أكثر موقف يحصل لي لما أكون مستعجله هي إني
بعد ماأسوي الشاهي والقهوة وقبل أزلها في الترامس
أعكس وأصب الشاهي على الهيل بالترمس (: << ماعمركم جربتوا شاهي بالهيل (:


س6/ هل يعتمد عليك في إدارة المنزل بشكل عام عند غياب الأم ؟
كثير ... الحمدلله ..
للأسف إننا مالحقنا على رفاهية بعض بنوتات هاليومين (:

س7/ يعتمد عليك في الطبخ خاصة أولا ؟
أكيد .. خاصه اني كنت ربة بيت في فترة من فترات حياتي ..

س8/ اول كتاب طبخ او برنامج أو موقع اعتمدتي عليه في الطبخ ؟
ماغيره .. كتاب أطباق النخبة للكاتبة أمل الجهيمي ...


س9/ تحبين أحد يساعدك في شغل المطبخ ؟ او تحبي تكوني لوحدك ؟
الصراحة .. أرتبك كثير وأتوتر
وماأعرف أسوي شي لما يكون معي أحد ..
لذلك أحب أكون لوحدي .. بس لا جت المواعين بأطلع وأخليهم وحدهم (:

س10/ هل تتقنين جميع أشغال المنزل ( نظافة غسيل طبخ )؟
للأسف ايه هههههه



س11/ نظامك في عمل المنزل؟ (يعني الطبخ عليك والمواعين على غيرك ,أو يوم شغل المطبخ عليك وشغل البيت الثاني على غيرك .....؟ ) ولا الله يخلي لكم الشغالة
لا للأسف ابوي الله يطول في عمره مايعترف بشي اسمه شغاله ..
مره إستأجرنا شغاله بنظام الساعات .. زعل ومشاها ..
الأكيد ان نظامنا أنا علي الفطور وقهوة الوالد يومياً .. وخواتي عليهن المواعين بالتناوب ..
والوالده الغداء .. والعشا حظ ونصيب (:


س12/ هل تعتقدين أنك ستكوني ربة منزل ناجحة ؟
ممكن .. العلم عند الله ..

س13/ إتقان الفتاة لأعمال المنزل هل تعتقدين أنهذا شرط ضروري في نجاح الزواج او فشله ؟
اكيد ضروري .. مافيها شك ...


س14/ نصيحة تقدميها لبنات حواء بشأن هذا الموضوع ؟ (اللي بعضهن الظاهر ماتدل مكان المطبخ بالبيت )
انتي الآن في بيت العائلة مخدومة ومدللـه
لكن بيجي يوم وتنحاسين .. إتقي شر هذا اليوم .. وإعملي له ...

س15/ طبق تقدمينه لأعضاء منتديات الموازين؟ ( ياحبذا لو يطرح في منتدى المطبخ ويوضع رابطه هنا )
تآمرين أمر يالغلا .. وهذا طبق سابق لي في المنتدى ..
وبإذن الله القادم يكون أجمل ..

http://almouazeen.com/showthread.php?t=34013

يعطيكم العافيه يالغوالي على الاجوبه الرائعه والعقلانيه
وان شاء الله لي عوده بأجوبتي بعد ماتخلص اختي شلاحيه

أبشركم إني أنهيت المرحلة الخامسة والأخيرة بحول الله وقوته ...


تفضلووو /



المرحلة الخامسة "

س1/يقال ان السر الوحيد الذي تستطيع حواء حفظه وكتمانه هو " عمرها " هل المقولة صحيحة ؟

الحقيقة انها صحيحة جداً بعد ههههه

س2/ ماهي نظرتك للمرأة المطلقة ؟ وهل ترين انها مظلومة من المجتمع ؟

اول شي الحمدلله على كل حال .. المطلقة غالباً ماإختارت مصيرها ..
لذلك مو من العدل تكون نظرة المجتمع لها ظالمة أو فيها بعض الريبة ..
أنا شخصياً أشوف ان الظلم اللي كان موجود سابقاً في نظرة المجتمع للمطلقة خف كثير .. خاصة في ظل زيادة معدلات الطلاق ..
بالعكس حالياً المجتمع يتعاطف معها كثير .. لكن بالمقابل هي يجب أن تعمل جاهدة لتحافظ على صورتها جميلة ومحترمة وراقية ...






س3/لماذا تطالب حواء آدم دائماً بالعطف والحنان، فيما تبخل هي عليه بهما، بحجة أن حواء هي العاطفية بينما آدم هو صاحب القلب الجامد؟

ابداً حواء لا تبخل .. فالمنبع لا يبخل أبداً ..
لكن حواء تحب أن تجد دوماً مقابل لعطاءها ... لذلك هي عندما تجد المقابل ومبادلة العطاء فهي تمنح المزيد !


س4/ برأيك لماذا آدم الشرقي لا يحبذ مساعدة حواء في الأعمال المنزلية ويعتبر ذلك انتقاصاً من رجولته ؟


بالعكس .. مسألة مساعدة الأهل في البيت واجب إنساني وسلوك سلكة قبلنا نبي الرحمة والإنسانية ..
لكن للأسف هو ربما فهم غير ناضج لمبدأ القوامة للمرأه على الرجل ..
يعتقد بعض الرجال أن قوامته لاتتحقق إلا بقسوة قلبه وجلافة طبعه مع أهله وأهل بيته ...


س5/ عندما يخطئ آدم يقولون ما أحمقه , وعندما تخطئ حواء يقولون ( ما أحمق النساء ) رأيك في هذا ؟

مجتمع ذكوري يا عزيزتي .. لذلك لا غرابه ..




س6/ أبي، أخي، عمي، ابني، زوجي ( للسيدات , والآنسات لاحقات خير ) ، جدي، أنتي .. رتبي التالي حسب أهميته لديك ؟


أبوي قبل الجميع .. لأن الأب واحد و لا يعوّض .. الله يطول في عمره ..
بعده أخواني وعمي في مرتبة واحده .. لأني أعز أعمامي وأغليهم غلاي لأعز إخواني ..
بعدهم جدي رحمه الله ... لأني حقيقةً لا أعرفه .. متوفي قبل أن نراه ..


س7/ يقال أن حواء تفكر بقلبها، بينما آدم يفكر بعقله، ماهو رأي حواء بهذه المقولة؟


قريبة للواقع بشكل كبير .. لكن يظل التعميم غير منطقي .. فالإختلاف وارد ..


س8/ رأيك وبصراحة في تعدد الزوجات ؟ وهل ترضين ان تكوني زوجة ثانية او ثالثة ؟


طبعاً الشرع الرباني حلل التعدد .. وبالتأكيد هناك حكمة وفوائد للتعدد ..
لكن بشرط العدل .. وللأسف هذا هو اللي ينتقص من نظرة المجتمع النسائي تحديداً للتعدد لأن الرجل لايعدل في حال عدّد ..
أنا شخصياً ماني مع التعدد .. إطلاقاً ..
بالعكس الوفاء مطلوب والتقدير لأم العيال مطلوب أيضاً ..
وليس من الوفاء مكافأتها بـ " جارة " ..
لكن هناك البعض يكون لديهم حاجة معينة للتعدد ..
هنا لانقول لهم إلا " وفقكم الله وكان بعونكم على تحقيق العدل "


س9/(آدم حنون ورومانسي- آدم وسيم- آدم جاد وصارم- آدم عملي- آدم ثري) أيهما تفضل حواء؟


الأولى بالتأكيد ... حسب الفطرة الربانية ( وجعلنا بينكم مودة ورحمة )


س10/ الحياة بلا حب بلا وجع قلب احلى , صح ام خطاْ ؟ رأيك في هذا وبصراحة ؟

لا مو صح ...
يكفي نحب الحياة ونحب والدينا ونحب أسرتنا وأخواننا
ونحب مجتمعنا وكل ماحولنا ...
الحب جميل والمساحات التي تحتاج للحب من حولنا كثيرة ..

فلماذا نحصر الموضوع ونحكره على ( حُب معين ) !
ونحرم أنفسنا من باقي جوانب الحب الجميلة في الحياة ..


س11/ الجمال في البنت أهم من الشهادة , هل ترين ان الجمال أصبح كل شيء لدى الشباب الذي يريد الزاوج في وقتنا الحالي ؟

لا أعتقد ...
الجمال مهم بالتأكيد ... لكن الشهادة ايضاً مهمه ..
على الأقل لدى شريحة كبيرة ...و خاصة في ظل تكالب ظروف الحياة المادية الصعبة ..


س12/ الحب يموت ويذبل كما يذبل النبات . هل هذا صحيح ؟

اممم .. لا مايموت ..
قد يخفت بريقة ويقل توهجه ...
و ينزوي بعيداً في زوايا الذاكرة .. لكن لا يموت ...



س13/ هل الخيانة طبع متأصل في آدم ؟


لأ ... الوفاء خصلة أقرب للرجل الحقيقي من الخيانة ..



س14/ كلمة اخيرة توجهيها لآدم , حواء ؟

آدم :
الشريك و الأب و الأخ و الإبن .. مسميات قد تكون عابرة لكن جوهرها ثمين جداً ..
حاول أن تقدّر جوهرها وتحتويه كما يستحق ..!

حواء :
نفس الرسالة لكن بإختلاف المسميات لـ ( شريكة , أخت , إبنة )


س15/ اختاري عضوة وقومي بإبلاغها على ملفها الشخصي ..

اكيد بأختار الغالية أوتار الحنين .. بناء على ترشيحك غاليتي نزووف ..

وأجزل الشكر لك يالغلا على هالموضوع ..
وماننحرم من إبداعاتك يارب ...

وأقولك سر / تراني أنتظر جديد مواضيعك بكل شوق
يعني فكري لنا بفكرة جديدة إذا خلص الموضوع هذا (:

غالياتي قبل أن أنهي مداخلاتي في الموضوع
أحببت أن أُعقب على مسألة بسيطة ...

حقيقةً أختي عاتبتني كثيراً عندما قرأت أجوبتي بخصوص عباية الكتف ...
وأثارتني كلمة قالتها وأحزنتني كثيراً ..
قالت ( أنتي كأنك تمنحين صديقاتك عضوات المنتدى تبريراً للبس عباية الكتف وتحثيهن على ذلك )
قلت لا أبداً .. بالعكس أنا ذكرت اني ألبس عباية رأس في أغلب طلعاتي ماعدا البر وطلعات البر لأنها خاليه من الناس !

قالت لكن من يقرأ كلامك يفهم ذلك ...
فأحببت أن أكتب هذا التعقيب ..
فأرجو أن لاتفهموني خطأ يا غالياتي مثلما فهمتني أختي ...
أنا لا أبرر ولا أُحرض على لبسها
لكني ذكرت وجهة نظري حول الموضوع ...
بتجرد وحياد تام ...
فأنا فعلآ أرى أن العباية الواسعه حتى لو كانت على الكتف أستر من ألف عباية راس مخصرة ومحدده لتفاصيل الجسم ..
لكن يبقى مجتمعنا وأهلنا وغالبيتنا نحترم ونقدّر عباية الراس ونتغاضى عن بعض مساوءها ..