غــــربه بـــلا عنــــــــوان ::

محمد الدحيمـي .. شاعر اعتدنا على غيابه .. واعتدنا أن نزداد شوقاً لقصائده ..
شاعر يفرض نفسه على كل ذائقه تعي ماهية الشعر بين متعة الفهم ولذة المعنى ..‏

عندما نصـل إلى قراءة قصيده للدحيمي فإنـنا نـتـنفس الشعر الحقيقي بـأبعـاده ومراحله ..

محمد الدحيمي .. مزج جميع الوان الشعر‎ .. بناء ،، صور ،،جزاله ،،
قوه ،، عذوبه .. مبدع في كل طابــع ولون‏ ..

إنه شاعرٌ يـنـقلنـا إلى واقع فوتوغرافي الوانه صافيه .. واقعٌ صوره ذات تقنية عالية المستوى..

إنه شاعرٌ يحسب حساب القصيدة منذُ ولادتها .. حتى آخر نبض فيها
فـتـخرج قصائده بأحلى الحُــــلل


ومن قصــائده الرائعه التي أحبـبت نقـلها لكم :

[ غــربه بـلا عنـــوان ]






يعيـن الله يادنيـا تسـوق أيّامـهـا الأحــزان
يعين الله .. وانتي مثـل قفـل ٍ ضـاع مفتاحـه
يعين الله ... وجروحي لها في كـلّ وقـتٍ شـان
كذوب اللي يقـول ان الزمـن بيـداوي جراحـه
سقى الله يوم انا يمّه غريـر ٍ يزعـج الجيـران
سقى الله يوم أنا طفـلٍ يصـج البيـت بصياحـه
سقى الله يوم كان اقصى طموحي .. لعبة الدنـان
نهاية يومي المغرب ... وأخاف الليـل واشباحـه
سقى الله يوم انا البس بشت ابوي وثوبه القيطـان
واقلد كلّ شيٍ فيه .. حكيـه .. جـدّه ..مزاحـه
واشيل المسبحه مثله ليا هوجـس وهـو سرحـان
بيشعر ...واحسب ان اللي عطاه الشعر مسباحـه
سقـى الله بيتنـا ذاك البسيـط مشقـق الجـدران
شجـاع ٍ يهـزم الغـدراء بقنديلـه ومصبـاحـه
تكحّلنا القناعه .. لا طمع .. لا هم .. لاحرمـان
وإذا جاء الليل تكفينا ثـلاث اخـوان ..طرّاحـه
جميع الذكريات اللي غـدت فـي قفـرة النسيـان
يحاكـي حلوهـا عبـره بمـوق العيـن سبّاحـه
خذتني غربةٍ عنوانهـا ... غربـه بـلا عنـوان
ابي عقب التعب راحه ... لقى فيني التعب راحـه
رجعت اليوم مثل اللي رجع عقب القنص خسران
غدا طيـره وجـاء يسحـب سلوقيـه وملواحـه
قصيده مابَعَـد مـرّت ببـال مساعـد وضيـدان
هواجيـس ابـدويٍ هايـم ٍ فـي عشـق فلاحـه
وروح ٍ تايبـه كانـت تبـي لذنوبهـا غـفـران
خطاي انّـي كتمـت اسرارهـا بعيـون بواحـه
تقوليـن المطـر ماهـوب يمّـه دايـمٍ هـتـان
اجل معذور قلبٍ في همومـه ضاعـت افراحـه
انـا يمّـه غلطـت ولانـي اول واحـدٍ غلطـان
ابونـا آدم مـن الجنـه خـرج بأسبـاب تفاحـه
خذلك الوقت فينـي .. ماخذلتـك ياأعـز إنسـان
وش الدبره ؟ وحظي صار.. قفل ٍ ضاع مفتاحه !!





/
:
/
:

لكــم أرق التحـــايا ..
ودمتــــم بألف خيـــــــر ..

صح .. لســـان شاعـرها .. وتسلـمين اختي اميره في حبه
على هذا النقــل الــرائع .. تقبلي فائق تحياتي ..
سلطان الميزاني ..

صح لسان محمد الدحيمي ولاهنت ياميره في حبه
على القصيده

تقبلي ودي

مبارك المطيري

صح لسان الشاعر محمد الدحيمي
وسلمت اناملك على النقل المميز ..
دمتي بخير