حاربت عيني النوم

غير متواجد حالياً

هذه القصيده قلتها عندما تعرض العقيد سعود بن تركي الحلفي الى حادث مروري نتج عنه وفات زوجته واثنتين من بناته واصيب هو بكسور شفي بعدها ولله الحمد وكنت انا قريب من موقع الحادث وتوجهت للمستشفى ورأيت ما رايت والحمد لله على كل حال وابو تركي تربطني به علاقه قويه وهو رجل يستاهل كل خير

بغيت انام وحاربت عيني النوم = والقلب ياعيسى تزايد عذابه

وجلست انا يابوك ضايق ومهموم = وصارت دموعي مثل وبل السحابه

ابكي على االلي صار في حادث اليوم= امرٍ من الله والله الامر جابه

وليا بكيت سعود مانيب مليوم = لعل رب العرش يجبر صوابه

سعود تركي للصعيبات زيزوم = مافيه مثله والاسامي تشابه

ابكيه حي وكلها ايام ويقوم = بامر الله المعبود منشي سحابه

وهذا يابو تركي مقدر ومقسوم = وما جا من المعبود عبده رضابه

دنياك هذي كلها اقدار وسهوم = كم واحدٍ سهم المفارق لجاء به

وكم واحدٍ من جور الايام مسقوم= يمسي ويصبح في هموم وكآبه

راعي الوفاء والطيب تدري به القوم= والا الردي يموت ماحدٍ درابه

ونكان لاغاب القمر تطلع نجوم= ياسعود نجم الليل ماحدٍ سرا به

انت الذي مثل البدر دايم الدوم= نورك على المطران كلٍ مشا به

ومعروفكم ضافي على باقي القوم= تفزع مع الاقصين ومع القرابه

ياسعود تركي ياسند كل مضيوم = من هيبتك حادثك كلٍ درابه

كنه صدر في نشرة العصر مرسوم= العلم بين الناس كلٍ حكابه

كلٍ يقول الله يشافيه ويقوم = يالله عساها دعوةٍ مستجابه

والامر لله فارض الحج والصوم = رب النبي والعرش رب الصحابه

لكن ليت الحر يفدونه البوم = وليت الثعل يموت قبل الذيابه

وليت المنايا تاخذ انذال ورخوم = وتصد عن رجال يحسب حسابه