|
||||||
|
||||||
|
||||||
|
 |
 |
 « آخـــر الـــمـــشـــاركــــات » |
|
|||||||
| الأدب العام القصص و الروايات وكل ما يخص الأدب دون الأشعار. |
 |
| انشر الموضوع |
|
|
أدوات الموضوع |
 غير متواجد حالياً
|
رقم المشاركة : ( 1 ) | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
كريم ....سبلا والحظ منحوس 3
كُتب : [ 10 - 02 - 10
- 02:01 AM ]
الحلقة الثالثة المـــشــــهــــــد الأول ويوم نزل أبو عزيز وليا هو نازل على هاك البكره العفراء اللي سنها مفروده (حاولوا ياإخوان تتصورون معي الموقف البكره كانت هي الوحيده اللي واقفه في الخط الراعي في ظهر ذلوله قد قطع الخط والابل الباقيه بعيد عن الخط باقي ماوصلته المهم حاول أبو عزيز إنه يتحاشى الاصطدام في جسم البكره وبالفعل نجح في ذلك وأستطاع إنه يلف عن البكره جهة اليمين يعني عقبها من الخلف بحيث أن رأس البكره ونحرها وبطنها صار على يسار أبو عزيز لكنه شطف رجلينها شطف بصدام ورفرف وكبوت السياره من جهة اليسار مكان ما وضع الشايب الأعور يده ولكن كانت هذه الشطفه هي التي قسمت ظهر البعير وللتذكير ياإحوان الخط كان غزير يعني كبير من الوسط ومن الجانبين وعلى يمينه ويساره حصى وصعانين كبار يعني كان خط وعر ولم يكن أرض مستويه يقدر أبو عزيز يطلع منها بسهوله وهو على سرعته )المهم وقفت سيارة أبو عزيز بعد ماأخذت في طريقها كم حصاه لكنها كانت شغاله ولا فيها شي يمنعها من المشي وكان أبو عزيز يقدر يهرب ويترك الوضع على ماهو عليه ولا من شاف ولمن درى لكن خوف الرجل من الله وشهامته منعته من أن يفعل ذلك ( وليس كما يفعل البعض إذا صدم إنسان تركه يسبح في الدم وهرب ) المهم نزل أبو عزيز من سيارته وراح يم البكره ويوم جاها لرجليها متكسره من عند العراقيب وعظام ساق الرجل طالعه من الجلد وتأكد الرجال من أن هذه الكسور لا يمكن تجبر مره ثانيه وأنتم تعرفون يالربع إن من عيوب الأبل إنها حساسه لعملية الكسور الزبده أن هالبكره ماعاد فيه أي أمل إنها تمشي بالمره . جاء الراعي على ظهر الرحول ويوم شاف الوضع وهو يقوم يبكي ويصيح ويضرب راسه بيدينه ويقول ياخراب بيتك ياعصمان يالزول أنت ويش عملت فينا إيش هالمصيبه اللي سويتها قاله أبو عزيز جن يامال الجن أنت صاحي ولا مجنون علامك قمت تصيح وتنوح قاله عصمان يالزول أنت عارف شنو اللي سويته قال إيه أعرف صدمت حرسوسك هذا اللي الله حطه في نحري قاله عصمان أنت تدري منهي هذي يالزول هذي نفرتيتي هذه شيخة البكار هذي أم الدلع والجمال قال أبو عزيز والله مدري ويش تقول الظاهر إنك مانت بصاحي لكن عمك راعي الابل هذه من هو وهالحين وينه فيه قاله راعي الإبل أسمه الشيخ أبو أمجد وفات من شويه قدام قاله أبو عزيز خلاص دق عليه بالجوال خله يجينا قال عصمان مقدر أكلمه مستحيل أعصابي تتحمل أعلمه بالخبر قال أبو عزيز عطني رقمه ويش أسمه المهم عطاه الرقم وعلمه بإسمه وقام أبو عزيز ودق على أبو أمجد آلو سلام أنت راعي الإبل اللي في هاك المكان إيوا أنا صاحب الإبل إيش تبغي مني قال أبو عزيز أبغاك تجيني هالحين ضروري عند البعارين قاله أبو أمجد قولي إيش عندك قاله أنت تعال وأعلمك ويش عندي وبعد ماسكر أبو عزيز الجوال أبو أمجد كان معه إثنين من أصحابه وقالهم شكل الراجل هذا من الناس المتطفلين اللي إذا شاف صاحب الإبل جاء عنده وقاله تكفى خل الناقه هذه حقتي تنام الليله مع الجمل حقك لكن أبغى أكلم عصمان عشان أقوله سيبك من المتطفل هذا ولا تستناه المهم دق أبو أمجد على عصمان وسأله عن السالفه وقال عصمان ياعم أبو أمجد أصل الزول هذا صدم ...صدم.. صدم نفرتيتي وهو يرمي الجوال وهو يقوم يصيح مره ثانيه ..وأبو عزيز يقول الناس هذي ويش اللي الله طرحني فيها الراعي مجنون والعم نص كلامه ماأعرفه .. المهم وصل أبو أمجد وإخوياه ويوم شاف نفرتيتي طايحه على جنبها ما تمالك أعصابه وقال لأبو عزيز بلا في شكلك يا......يا......يا...... إلخ أبو عزيز قاله ياولد يالأجودي ياللحيه الغانمه يابن الحلال ويوم شاف إنه مواصل في السب والكلام اللي ماهو طيب إرتفع ضغط أبو عزيز وأركبه الشيطان ورجع يم سيارته وأخذ قطعة ماصوره كانت في الصندوق وراح توالي أبو أمجد ناوي على الشر وقال أنت شكلك ناوي تلحق بكرتك هذي لكن يااخوان أصحاب أبو أمجد اللي كانوا معه كانوا محضر خير .... ولا هم من الناس اللي يلحقون المشاهيب وقاموا وامسكوا أبو أمجد ودوه يم سيارته وعصمان مسك أبو عزيز ورجعه لسيارته وقال واحد من أصحاب أبو أمجد مافيه داعي للمشاكل وكل واحد منكم يسب ويشتم الثاني فيه نظام وقانون الآن أتصل على الشرطة وتجي وتتولى الموضوع وبالفعل دق الرجال وطلب الشرطه وبعد شوي راح صاحب أبو أمجد يم أبو عزيز في سيارته وقام يعتذر منه وقال لا تلوم أبو أمجد هذه كانت أجمل وأغلى بكره عنده وكانت مرشحه إنها تحقق مركز متقدم في مهرجان الإبل حتى تصدق إنه قبل يومين سايمها منه الشيخ أبو أسعد بعشره ولا باعها قال أبو عزيز منول أحسب إنه من الرياجيل اللي تقدر الوضع وتعرف إن هذا قضاء وقدر وهالحين بعد ماشفت علومه طابت النفس منه وكان ميده العشره الله لا يشكر له فضل نعطيه عشرته وخله يفارقني ويقوم أبو عزيز يطلع البوك حقه ويقول للرجال هذه خمسه آلاف ريال روح عطها له والخمسه الثانيه أبتصل على رجال يجيبها وكلها نص ساعه وفلوسه عنده لكن علمه لا يقوم يطّلق لسانه علي ثم يصير شي مايتوقعه قال خوي أبو أمجد لأبو عزيز الله يصلحك يا ابويه إيش خمسه وعشره آلآف أقولك الراجل يسومها بعشرة مليون وأبو عزيز يطيّر عيونه فيه ويقوله ليه أنا صادم لي حاشي ولا صادم برج المملكه .... المشــــــــــهــــــــد الثاني وصل جيب الشرطه وكان سواقه العريف عبد الرحمن وعلى جنبه الرقيب أبو نمر (أبو نمر أشهر من نار على علم في الديره فهو ظابط خفر ورئيس التحقيق والكل في الكل في الشرطه لكنه رجال رجله ثقيله يعني يومه سنه ويحب الظهور ويموت في السوالف وعشقه الأول التصوير لدرجة إن أي زواج يحضره أبو نمر معروف إن مكان أبو نمر دائماً جنب المعرس ) وأول مانزل راح يم أبو عزيز في سيارته وسلم عليه وركب معه وقال يالله تحيي أبو عزيز وش لونك وكيف الحال وينك ماشفناك لنا مده وعلمني عن فلان ويش أخباره وفلان ويش صار عليه المهم إن الرجال قلبها سوالف ويوم خلّص قال سلامات يابو عزيز السالفه ويش قاله أبو عزيز السالفه بالكامل قال أبو نمر خلاص أنا بروح أشوف الرجال واخذ علومه يمكن يتنازل عنك أنت يمكنك ماعرفت تفاهم معه زين .. أبو أمجد كان جالس في سيارته مع أصحابه ويتفرج في الوضع ويقول ياحبيبي شكل الأثنين طلعوا من جماعة بعض .. المهم راح أبو نمر يم أبو أمجد وحصله هادي شويه بعد ماشرب كم كاس من عصير السوبيا وركب أبو نمر قدام مع أبو أمجد في سيارته وقاله وش لونك وكيف الحال من وين أنت جاي وين رايح قاله أبو أمجد أنا جاي من بعيد ورايح أشارك في المهرجان حق الإبل قاله أبو نمر والبعارين هذي كلها لك قاله أبو أمجد إيوا يابوي هذي كلها إبلي قال أبو نمر وكلها مقيمه عندك قال أبو أمجد إيوا يابوي مقيمه عندي أجل متخلفه . المهم قام أبو نمر يناظر في الأبل و قال هالحين أنت علامك معلق في أرقاب بعارينك لوحات مثل لوحات السيارات قام يضحك أبو أمجد وقال شوف الإسم الكريم إيش قال معك أبو نمر على الخير والشر شوف يابو نمر هذا اللي تشوفه في أرقاب الإبل هذا الله يسلمك الوسام حقي قاله أبو نمر قصدك الوسم الوسم قاله إيوا إيوا يابوي هوا هذا قصدي قاله أبو نمر وعلامك ماحطيت لك وسم مثل أوسوم الرياجيل المعروفه قال أبو أمجد إيش الكلام اللي تقوله الله يصلحك يابوي مجنون أنا أشتري ناقه بكم مليون وأروح أشوهها وأحرق وجهها بالنار هذي حركات ناس متخلفين يابوي أنا أستخدم طريقه حضاريه وعمليه حتى التكنولوجيا دخلتها في الموضوع ويقوم أبو أمجد ويطلع جهاز الكمبيوتر المحمول ويفتح هاك البرنامج ويقول تعال شوف قلتلي إسمك إيش قال معك ابونمر أبو نمر شوف يابو نمر الله يسلمك هذا برنامج فيه أسماء كل الإبل حقاتي وكل ناقه قدام إسمها تحصل رقمها التسلسلي والصوره حقتها مثل نفرتيتي اللي قتلها المجرم الشرير هذي صورتها والرقم التسلسلي حقها كان N99/9 بالمره كان رقم مميز قال أبو نمر هذا صار رقم معامله قاله أبو أمجد خليني أكملك باقي الأسماء حقت إبلي شوف هذي إسمها ( بلقيس ....جولييت ....الدانه .... الإمبراطوره .... الإسطوره ....كوكب الشرق .... إلخ )قال أبو نمر وابك الأسامي هذي ويش أنت وراك ماسميت بعارينك بالأسامي المعروفه مثل ( العشوا .... العلياء .... البويضاء .... إلخ ) قام يضحك أبو أمجد ويقول الله يصلحك يابوي هذي صارت موضه قديمه قاله أبو نمر والجمل هذا فحل الأبل قال أبو أمجد إيوا هذا الفحل حقي إسمه أبو الهول والإبن حقه إسمه روميو قال أبونمر إسم الله الرحمن الرحيم أنت ماشفت غير الهول اللي يروع الناس تسمي بعيرك علاه وفجاه وأبو نمر يناظر في شاشة المحمول شاف صورة بنت مع صور الابل وقال لأبو أمجد البنت هذي علامك حاطٍ صورتها مع صور البعارين قال أبو أمجد هذي الله يسلمك قلتلي إسمك إيش قال معك أبو نمر قال شوف يابو نمر أصل أنا عندي ولدين هاني مهندس في مطار جده والثانيه بنتي الوحيده الجوري حبيبة ابوها طبيبة أسنان وعندها عيادة خاصه بجده وسميت البكره هذي الجوري على إسم بنتي بالله عليك يابو نمر تعالا شوف مايشبهوا بعض من ناحية الجمال الفطري ( بيني وبينكم ولا يسمعنا الرمح الجوري كانت مسكته ) قال أبو نمر طيب لوتسرق البعارين والا تضيع وشلون تعرفها قال ابوامجد اول شيء مستحيل تنسرق لن عندها الحارس عصمان وثاني شيء مستحيل تضيع لان الإبل يابونمر مثل الحمام إذا اعطيته طعام كويس لا يمكن يسيب العشه حقته قال ابو نمر عزالله انك راعي الابل اللي ماجابن البيض مثله إن عاش راسي وانا ابونمر انك لتَقلب راسك انت وعصمان في مراحها ماعندك منها ولا ناقه قاله ابو امجد إيش تقصد بالكلام هذا مافهمت منه شيء قال ابونمر ابونمر ماهولازم تفهم لكن هاه باقي عندك صور بنات قصدي بكرات أعوذ بالله من الشيطان الرجيم أنت وين عرضتلنا يابو عزيز أنت وهالبكره مع هالصبح وابو عزيز يقوم يصيح على أبو نمر ويقوله أنت علامك ماتخلصنا من اليوم ويش تسوي عندك قال أبو نمر بلاك والله ماشفت الجوري يابو عزيز يابو أمجد يقوله أبو نمر أنت ويش رائك تنازل عن الراجل هذا وتقدر الوضع الحاصل قضاء وقدر وإن شاء الله إن الله بيعوضك خير عن بكرتك اللي صدمها أبو عزيز قاله أبو أمجد إسمع أنا كلامي واحد وواضح الراجل هذا يدفع قيمة نفرتيتي عشرة ملايين قاله أبو نمر الرجال هذا لو عنده عشرة ملايين ماشفته هنيا يهبهب مع روس الجذيب وبعدين أنت صاحي ولا مجنون يوم تطلب عشرة ملايين في ناقه ماتسوى لها عشرة آلآف يعني أفهم من كلامك هذا إن ماعندك نية تنازل عن الرجال قال أبو أمجد لا بالمره ماراح أتنازل عنه قال أبو نمر خلاص اليوم خميس ولافيه دوام الوعد يوم السبت أنت وياه تجون ونشوف وضعكم إن ماتفاهمتوا حولنا قضيتكم للمحكمه قاله أبو أمجد وحتسيب المجرم هذا طليق لحد يوم السبت إفرض إنه شرد برات البلد لازم تأخذه معاك داحين وتحطه في السجن لغاية يوم السبت قاله أبو نمر الرجال ماهو ذابحاً ولدك علشان أسجنه يوم السبت أنا المسؤؤل لا يهمك إن ماجاء أنا أجيبه لك . المهم نزل أبو نمر من سيارة أبو أمجد ولياهو يشوف هاك الناقه الخلفه اللي درّت على ولدها وينادي عصمان قاله اخذ لك طاسه وروح أحلب لنا الناقه بسرعه وراح عصمان وجاب له الحليب واشرب يابو نمر من الحليب لين عيّن من الله خير قال أبو عزيز هذا والله الحظ الأقشر اللي خلى مشكلتي هذي تصير يوم إستلامك يابو نمر يابن الحلال اخلص علانا أنا رجال عازم لي رياجيل وتأخرت عليهم قام أبو نمر يضحك وقال ماشاء الله عليك يابو عزيز عندك عزيمه والله إنك كريم سبلا والحظ منحوس اللي يقولونه . المهم يالربع بعد جهداٍ جهيد قال أبو نمر ياعريف عطنا دفتر المحاضر ويقوملك أبو نمر ويكتب هاك المحضر اللي كله على بعضه ماغير سطرين وتوقيعه أكبر منه وقال يله تعالوا وقعوا وهالحين أنت يابو أمجد استاق بعارينك والله يستر عليك وأنت يابو عزيز البكره اللي الله رماها في نحرك صارت بكرتك وتصرف فيها والوعد يوم السبت راجعونا في القسم قال أبو أ امجد وين ياحبيبي ماشوفك وثقت الجريمه هذي بالتصوير قال أبو نمر وشلون يعني قال أبو أمجد أنت ماتعرف أن أي محقق يطلع يحقق في جريمه لازم تكون معاه كاميرا قاله أبو نمر والله أنا لي خمسطعش سنه وأنا محقق ولا عمري أخذت معي كيمره لكن يله الحق بعارينك وتوكل على الله . أبو أمجد يالربع شك في الوضع وقال شكل العسكري هذا ناوي له على نيه مهي كويسه بالمره وقام وطلع كاميرا فيديو كانت معه في السياره وأخذ يصور الموقف بنفسه وأبو نمر شاف السالفه فيها تصوير وهو يقوم يترزز قدام الكاميرا رايح جاي على باله إنه في حفلة زواج هههههههههه. المـــــــشــــــهــــــــــد الثــــــــــــــــالث المهم في اللحظه وصلوا ربع ابو عزيز جايبين حسب الوصف وشافوا سيارة الشرطة والناس مجتمعين في ها الصحراء واستغربوا الوضع وقالوا من باب الفضول خلونا نشوف ويش السالفه يوم جوا ولياهي العين وما تعرف رفيقهم ابو عزيز قدا مهم سلموا عليه واسألوه عسا ماشر العلم ويش قالهم ابو عزيز يالربع مافيه شيء انتم كملوا طريقكم وروحوا يم المكان وعانوا عزيز وعمه في انتظاركم قالوا الرياجيل ماحنا رايحين لين تعلمنا في السالفه يوم ماقدر فيهم قام الرجال وعلم ربعه بالسالفه كلها قالوا اجل حنا نبي روح يم الرجال نكلمه مره ثانيه قال ابو عزيز وأبو نمر يالربع الرجال هذا علوم الطبيب والسنع مايعرف منها شيء لكن لا تتعبون أنفسكم معه وتركوه يروح قالوا حنا نبروح يمه ونبي نطق حصاته هالمره يمكن الله يهديه المهم راحوا الرياجيل يم ابو مجد واصحابه وبعد ماسلموا عليهم تكلم واحد فيهم (راعي خبز البر) وقال انا فلان وهذولي ربعي وحنا من هاك العرب و ابو عزيز معرفه ورفيق لنا والي صار قضاء وقدر وها الحين حنا طالبينك ياللحيه الغانمه مطلوب (ويقوم يحب خشم ابو مجد) الاوله بالناموس والثانيه بالفلوس قال ابو امجد اسمعوني حركات ياللحيه ويا السكسوكه الغانمه وحب الخشوم حقتكم هذه ما تمشي عند ابومجد زي ماقلت للعسكري من شويه المجرم هاذا يدقع عشره ملا يبين يعني عشره ملاين والابيني وبينه المحاكم وصديق ابو عزيز يرتفع عنده السكر وقال لابوامجد اسمعني زين ياللحيه اللي ماهي غانمه الله يبارك في . ........ اللي خلوك انت واشكالك ..... . ... حرش العراقين والامنول ما ......... غير خطلان الأيدي يوم انت جالس في ..... .. وحلالك نعرفه ماغير ....... }حاول ضبط اللسان حتى لو كنت غضبان فأنت في زمن فيه للكلمة ثمن{ المهم رجعوا الرياجيل من عند ابو امجد اللي جاء وقال لأبو نمر ياعسكري سجل عندك الراجل هذا سبني وقذفني بكلام مره جارح قاله ابو نمر أقولك يالله توكل على الله بس وابو امجد يلحق بعارينه ويقول لصحابه اللي معه انا ماني مرتاح من حركات العسكري هذا انا لازم اعملي اتصلات وبالفعل قام ابو امجد يعمل اتصالات على مستوى أعلى من ابو نمر من شرطة الديره كلها . قال ابو نمر كيف تتسوي بالبكره الحين قال ابو عزيز اول شي انتم يالربع يقصد ضيوفه روح يم المكان وانا ابا اروح يم المحطه اجيب لي منها أغراض ويمكن احصل لي دنا مع الطريق تجي تشيل البكره المهم يا لربع ثلاثه من اخويا ابو عزيز توجهوا يم ابو بطنين وعزيز والرابع( راعي خبز البر) جلس مع ابو عزيز قال ابو نمر خلاص انت روح يا ابو عزيز اخذ أغراضك وانا ابطلع على الطريق اوقف لك الدنا في حروة انك تجي . راح وركب ابو عزيز سيارته هو وخويه يوم جوا يبي يمشون لان ابو نمر ينادي يا ابو عزيز تعال اشرك لنا الجيب الماخوذ بطاريته ضعيفه وإذا طفيناه معاد يشتغل غير بشتراك ورجع ابو عزيز وشرك لهم موترهم ( حتى ددسن ابو عزيز كريمة سبله ) واتجه يم المحطه ابو نمر طلع على الطريق سوا له نقطة تفتيش وقال للعريف خلك في الجيب وانتبه لا طفيه المهم انتظر ابو نمر تجي دنا من حقات الابل عليها ونش ولا جاء شي وفي الاخير جات دنه عليها اثنين باكستانيه ومحملين معهم غرفة نوم لاكن باقي في اخر الدنا مكان يشيل البكره قال ابو نمر لسواق الدنه يالله عطني الإقامه والرخصه والاستماره يوم شافها قال ماشاء الله عليك يا صديق المهنه سباك والرخصه مافيه والسياره ماهي باسم كفيلك يالله الحين قدامي على التوقيف والباكستاني يقوم يتطلب ابو نمر ويقوله يا محمد انا مسكين وهذا سياره حق صديق انا قال ابو نمر خلاص اسمحلك لكن تشيلي معك جمل قال الباكستاني يامحمد كيف اشيل جمل مافيه ونش يمكن هو كسر هاذا غرفه نوم بعدين مشكل كبير قاله ابو نمر لا لا ماعليك الجمل صغير مايجي كبر بطنك هذا والكسر ماهر كاسر شي ابو عزيز ما قصر خدمك وحش عراقيبها حش المهم وصل ابو عزيز وقال لاابونمر انت وراك ماوقفت لنا من الدن حقت الابل اللي عليها ونش قاله ابو نمر يا ابن الحلال ماحصلت غيرها شيء لاكنها تتكفي لكن انت وين تتودي البكره قال ابو عزيز ابغاه يوديها لي يم المسلخ قال ابونمر يالله يا صديق تشيل البكره زي ماقلت لك و توديها يم المسلخ وانت انتبه يا ابو عزيزلا تعطيه فلوس تراني متفق معه يشيلها لك بلاش المهم شال ابوعزيز البكره مع الباكستاني وعطاه خمسين ريال حقة المشوار واخذ رقم جواله وقال انتظر يا صديق في المسلخ لين يجيك اخوي يأخذ البكره منك وقام ابو عزيز ودق على اخوه وقال له روح للمسلخ وقابل راعي الدنا واخذ البكره اللي معه واذبحها وخل القصاب يقطعها لك تقطيع صغير ويوزعها في كراتين وبعدين روح ودها يم الاشاره اللي يتجمعون عندها العمال ونادهم عليها خلهم يتوزعون اللحم وقال اخو ابو عزيز البكره هاذي وش سالفتها قال ابو عزيز بعدين لا جيتك علمتك بالسالفه . المشهـــــــــــــــد الرابـــــــــــــــــــــــــــــع وصل ابو عزيز هو خويه لمكان الكشته وحصل ابو بطنين طابخ الغداء وجلسوا يتقهون قال ابو بطنين الله يهديك يا ابو عزيز على كثر الناس ماشفت غير ابو امجد هاذا مشهور بأنه شديد وحريص على الدنيا انت ماتعرفه قال ابوعزيز لا والله ماعرفه والله يزيدني فيه جهل قال ابو بطنين ياخوي هاذا صاحب شركة مقاولات كبيره ودايم هو يستلم المناقصات وعنده سلسلة مطاعم وأسواق وفنادق ويقوم ابو بطنين يعدد املاك ابو امجد قاله ابو عزيز تبغاني اعلمك فكني منه ومن سيرته هذا مافيه خير لاهو ولا امواله لاكن خلنا نسولف وناخذ علوم بعضنا . المهم خلص الغداء وتغدوا الرياجيل وقعد ابو عزيز يسولف ويضحك مع ربعه وعزيز والهندي قاموا يلعبون بالكوره وابو بطنين راح يمشي عشان يهضم بعد الغداء وجاءت كورة عزيزعند ابو بطنين قال له عزيز يا عم شوت الكوره علينا وابو بطنين يثبت الكوره وهو يشوتها بكل ماعنده من قوه يوم شاتها هو يطيح ويمسك ركبته ويقوم يصيح (يااخوان ابو بطنين عنده مشكله قديمه في رجله وهي ان الركبه عنده تطوس أي تخرج من المفصل وهي حاله مشهوره وشديدة الالم واعتقد انها مايسمى ألان بانقطاع الرباط الصليبي وأتمنى منكم ان تتذكروا هذه المعلومه لانها ستكون حاضره معنا في مشهد قادم ) وجاء ابو عزيز يركض ورجع ركبه ابوبطنين إلى مفصلها لانه صار عنده خبره من كثر مايرجع ركبته إلى مفصلها يوم جاء قبل العصر نادى ابو عزيز صديقه ابو بطنين وقال انا باخذ الربع في المشوار الفلاني ويش رايك تاخوينا قال ابو بطنين لا والله اسمح لي انت تعرفني يا ابو عزيز مالي في هالسوالف هذه ولاني من اهلها واخذ ابو بطنين هنديه ورجعوا يم ديرتهم واخذ ابو عزيز اخوياه يم مكان بعيد شوي وخالي من الناس في جنب هاك الضلع وزين الرجال الفرشه في ظل سيارة اخوياه ونزل عندهم القهوه وراح على سيارته وطلع في الضلع ورز له الرجل كم ....... ورجع يم ربعه واطلع ام ....... من خلف المرتبه وقال اليوم يا ابو فلان تراني ناويك بنيه قال خوي ابو عزيز انت الله يهديك حطيت الماخوذات بعيد وانا والله اني عقب ماصابني السكر النظر ماعاد هو زين يا ابو عزيز قال يا رجال لا تقوم تحوص المهم ياالربع قاموا الرياجيل ........ مره ابو عزيز ......... ومره ربعه........ حتى عزيز ماقصر صحيح انه ماصاب شيء لاكن ينتظره مستقبل طيب . يوم خلصوا قالو ربع ابو عزيز حنا نبي نروح يم ولد عمنا اللي مواعدينه ويش رايك تروح معنا قال ابو عزيز انتم يا الربع تشوفون الوضع يوم السبت عندي مراجعه في الشرطه ابي أشوف راعي البكره ويش اخرتها معه قالو حنا يا ابو عزيز لولا هالضرف اللي حصل ماحنا مشاورينك في الروحه معنا بناخذك لو بالقوه المهم مشوا الرياجيل وابو عزيز ولده رجعوا الديرتهم وصلوا بعد صلاة المغرب ودخل وصلى هو ولده وراحو وجلسوا مع ام عزيز وبناتها وحصل ولده الصغير عليه حراره وقال لام عزيز عطي الورع شراب عشان الحراره تنزل عنه وبعد ماعلموهم في قصة مشوارهم من اولها إلى أخرها قام أبو عزيز وكلم ابو بطنين يبي يشوف رجله وش صار عليها كلمه وساله قال له ابو بطنين لا ابشرك رجلي طيبه قال له ابو عزيز انت وراك ماتسوي العمليه وتفتك مره وحده قال يا ابن الحلال هذا انا رايح جاي على الرياض ويقلون اقرب فرصه بعد سته شهور لاكن خلك من رجلي انا توني جاي من عند سكن العمال حقيني رايح اخذ الشهريه من عندهم(200ريال وانت ماشي) يوم جيت لن عندهم قدر مليان من اللحم قلت هذا من وين جبتوه قالو اليوم يا كفيل فيه واحد نفر سعودي جاب لحم كثير عند إشارة عمال عزا لله يا ابو عزيزانك كريم سبلا حتى حاتم الطائي مايسوي سواتك اجل معقوله ان فيه شخص يعشي الهنود والبنقاليه عشا قيمته عشرة ملايين ههههه . قال ابو عزيز ان شاء الله انها صدقه عني وعن والديني لاكن انت وش رايك تسير علي وتعشى عندي قال ابو بطنين لا والله الليله اسمح لي ماقدر فيه مباراة بين الراقي( يستاهل الرحال ) والعميد وانت رجال لا تشجع الكوره ولا حتى تشوف التلفزيون مثل الناس المهم يالربع بعد ماصلى ابو عزيز صلاة العشاء في المسجد ورجع لبيته دق عليه ابو بطنين قال انت وينك قال في البيت قال ابو بطنين شكلك مادريت عن اللي صار قال ابو عزيز وش اللي صار قال شي مايجي على البال ولا على الخاطر ولا حتى تشوفه في الأفلام الهنديه قال ابو عزيز انت وراك ماتهرج ياهالخبل وتقول السالفه ويش. قال ابو بطنين السالفه يا ابو عزيز هيـــــــــــــــــــــــــــــ .(تشاهدونها في الحلقة القادمة ) يا أخوان هذه الحلقة الثالثة وباقي كذا حلقة أتمنى منكم أن تكونوا صادقين مع أنفسكم قبل أن تكونوا صادقين معي وتقولون لي هل نكمل الموضوع أو نكتفي بما تم حتى ألان وصدقوني ما راح ازعل لو قلتوا لي توقف بل على العكس ستوفرون علي عناء التفكير وجهد الكتابة إن شاء اله وساعدتني الظروف وكانت لديكم الرغبه فسوف تشاهدون في الحلقة القادمه ابن مصاول......شعراء الشنطه...... المهايطي .....المحامي عدنان ....ام عزيزمجرمه.........ابوعزيز سكران أتمنى أن يكون في ما قدمت ما يستحق أن تشاهدونه
|
التعديل الأخير تم بواسطة نزف المشاعر ; 10 - 02 - 10 الساعة 02:46 AM سبب آخر: خطأ املائي في العنوان
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
