الرصيد الي ينومس

يسألني احد الاشخاص ويقول كم رصيدك في البنك
ورديت عليه بهذه القصيده

الرصيد الي يـــــنومس ونعتبره رصيد = معرفة خطلان الايدي عزيزين الجناب

الرجال الي مع الكرب والشـــــده تزيد = ينطحون الكايده مايحســـبون الحساب

كل واحد بالمــــــواجيب واقف مايحيد = ماتغير ماقفــــه بالســــــؤال وبالجواب

والمثل معروف مال الحديد الا الحديد = والنشاما تحمل السيف مصقول النصاب

في نهار اللازمه يطلع العـــــلم الاكيد = تنكشف كل الحقــــايق ويطلع من يهاب

الشجاع الصيرمي دائماَ باسه شــــديد = يعشــق الجزلات والي لجاء به مايخاب

كلما جـــت لازمه قال ياهل من مزيد؟ = يشرب الفنجال ويقول طاب الحال طاب

الحـــرار الشقــــر دايم لها شكلٍ فريد = ماتشابه للحــــديا ولا شكــــل الغــــراب

ومن خشاش الارض والي سكنها ماتصيد = ماتصيد الا الكراوين من روس الهضاب

شف بالي ياهل العرف والراي السديد = الرجـــال الي يفـــكون لك عشــــرين باب

قلتها وانا اعشــــق الطيب وانابن بديد = ماقفــي بين الرجاجـــيل يحسب له حساب

وفعل ربعي بالمراجل حشا ماهوجديد = في زمــــانٍ فات ربعــــي يقصون الرقاب

والله انّـا باللــــوازم لنا باسٍ شــــديد = فعلنا معروف يوم الخطاء عكس الصواب

بس في تال الليالي طلـــع علمٍ جديد = من رصــــيده بالمــــــلايين يغزي مع ذياب

هب ياهــــــــذا الزمن يالعلك ماتفيد = كيف ساويت اشقر الريش مع فرخ العقاب

وكيف خليت المماليك بالدنيا تسيـــد = والوثايق والـــتواريخ صارت كــــالسراب

بس تدري كيف ياوقتنا ؟؟من دون اعيد = مايصـــــح الاالحقــيقـــــه ولو النور غاب

من سعـــى بالخير لازم يفيد ويستفيد = ومن تزهب عـــروة الدين يانعـــم الزهاب

والردي لوقال انامثل سيف بن الوليد = كلمــــا يذكر مـــع الناس قـــالو والتراب

صح السانك يابو عيسى والنعم بك وبذوي بديد

وياكثرهم بالوقت الحالي يابو عيسى .الي صاروا شيوخ بفلوسهم

قصيدة رائعة اخوي نعم الرصيد هو معرفة الرجال شرواك والرصيد هو الذكر الطيب قصيدة مو غريبة من شاعر جزل

صح لسانك يابو عيسى على القصيدة الجزله

صح لسان الشاعر ابوعيسى

بس تدري كيف ياوقتنا ؟؟من دون اعيـد=مايصح الاالحقيقـه ولـو النـور غـاب
من سعى بالخيـر لازم يفيـد ويستفيـد=ومن تزهب عروة الدين يانعـم الزهـاب

صح لسانك يا أبو عيسى وقصيدة جزلة من راس جزل وقد سبقونا الأولين بالقول:

المراجل ما تهيا هالسويا=كود من عض النواجذ في سنونه

فالأرصدة لا تاتي هكذا فلابد من التعب والسهر والأرق

في الماضي كانوا الناس سواء في حياتهم المعيشية ولم يفرق الرجال عن غيرهم إلا فعل أيدينهم وشجاعتهم ولكن في هذا الوقت هو وقت الماده والرأسماليه , وما أجملها عندما تكون شيخ وأبن شيخ ويكون عندك مادة تجملك بين الناس , وما أسواءها من حالة عندما يكون لك تعلق في الشيخة والشجاعة ولكن لا مادة تجمل مع الرجال والله سبحانه وتعلى قال زُيِّنَ للناسِ حُبُّ الشَّهَواتِ مِن النساءِ والبنينَ والقناطيرِ المُقنطَرةِ من الذهبِ والفِضّةِ والخَيلِ المُسَوَّمةِ والأنعامِ والحَرْثِ ذلك مَتاعُ الحياةِ الدُّنيا واللهُ عِندَهُ حُسنُ المآب

وقال تعالى : ولا تنسى نصيبك من الدنيا.

وهذه الأيام ما أكثر الرجال الذين شيختهم فلوسهم ولكن هل تنكرون ذلك عليهم؟؟؟؟وقد كدوا وتعبوا؟؟ بعد قرن او قرنين يصبحون شيوخاً رسميين حتى مع البشر حولهم

الدولة الآن عندها نصاب من رأس المال بعده يحق للشخص ان يكتب لقب شيخ بدون أي محاسبة الا وهو 50 مليون ريال هذا على حد علمي في الماضي ..يعني لو عبد أسود يطلق عليه شيخ وكما قال المصاريه(شيخ منصب)

المادة جعلت المتنبي وهو الرجل العربي الحر الأبي يمدح كافور الإخشيدي العبد الحبشي في مصر بمدح لا يمدح به أفضل العرب حسباً ونسباً هو صحيح سبه في الأخير لأنه لم يحصل على شئ منه ولكنه في البداية مدحه .

كل رجل يطمح للمادة ولكل ما ذكر في الآية أعلاه

صح لسانك يا أبوعيسى ولو لم تقل من قصيدتك إلا هذا البيت لكفى

الرصيد الي ينومـس ونعتبـره رصيـد=معرفة خطلان الايدي عزيزيـن الجنـاب

المشاركة الأصلية كتبت بواسطة ابن مشدد

صح السانك يابو عيسى والنعم بك وبذوي بديد

وياكثرهم بالوقت الحالي يابو عيسى .الي صاروا شيوخ بفلوسهم

ماعليك زود يابو سعود واشكرك عالمداخله

الله الله الله يابو عيسى والنعم فيك يابن بديد وانت رصيد لكل من يعرفك
ونعم الرصيد
ابو عيسى ماياتي الا بالجزل والله يعطيه العافيه

صح لسانك ياعبدالرحمن بن غلاب
قصيده رائعه من شاعر جزل
اتمنى تتقبل مروري
وننتظر جديدك

صح لسانك
أخوي الشاعر
عبدالرحمن غلاب الميزاني
قصيدة في القمة لا هنت